بنجائی وزیر ریلوے شیخ رشید احمد تون پرتگال نا زرکار آتا اوڑدہی، شونداری ڈٹ آتے ٹی زرکاری نا است خواہی نا درشان

اسلام آباد ۔ 23اکتوبر (اے پی پی) بنجائی وزیر ریلوے شیخ رشید احمد تون پرتگال نا زرکارو کاروباری بشخ انا بابت بندغ آک اوڑدہی کریر ہراٹی او پاکستان ریلوے نا شونداری ڈٹ آتے ٹی زرکاری نا است خواہی نا درشانی ءِ کرے و ٹرانسفر آف ٹیکنالوجی نا پیش کش کرے ۔ پرتگالی زرکار آک پاریر کہ پاکستان نا زرگزران ترندی اٹ شون ہلنگ ءِ ، زرکاری و شریداری نا وارخواہی تیان فائدہ ہرفنہ ۔ وزیر ریلوے شیخ رشید احمد پرتگالی زرکارآتے پاکستان ریلوے ٹی جاری ڈٹ آتیان معلومدار کرے ۔ اوپارے کہ پاکستان ریلوے اوپن ٹیک ایکسیس پالیسی اس جوڑ کرینے ۔ نجی بشخ ءِ تینا رولنگ سٹاک اتنگءِ بخیر اٹ پانہ ۔ نجی بشخ اٹی پرتگالی زرکاری نا است بڈی ءِ کینہ ہراریلوے نا نسخان ءِ چٹفنگ اٹ کمک ایتک ۔ شیخ رشید احمد پارے کہ پاکستان ریلوے کراچی ۔ پشاور مین لائین ون ڈٹ آ ترندی اٹ عملدرآمد کننگ ءِ ۔ ایم ایل ون ڈٹ آ بروک آ سال آن کاریم بناکیک ۔ 1872کلومیٹر کراچی و پشاور نا نیام اٹ پوسکن آ ٹریک آن ریل اٹی انقلاب اس بریک ۔ پرتگالی زرکارآتا سرکڑدہ پروفیسر ڈاکٹر جوز کارلوس کننگ ءِ ۔