پاکستان آزادانہ زرکاری پالیسی تیا عمل کننگ ءِ،جاپانی کمپنیک پاکستانی اٹی زرگزران نا چندی بشخ آتے ٹی دوئی کٹیا کروک وارخواہی تیان فائدہ ہرفر، صدر مملکت

ٹوکیو ۔ 23اکتوبر (اے پی پی) صدر مملکت ڈاکٹر عارف علوی پارینے کہ پاکستان آزادانہ زرکاری پالیسی تیا عمل کننگ ءِ و زرکاری نا سازگار چاگڑد و گچین وارخواہی فراوان کیک، جاپانی کمپنیک پاکستان زرگزران نا چندی بشخ آتے ٹی دوئی کٹیا کروک وارخواہی تیان فائدہ ہرفر ۔ او ٹوکیو ٹی جاپان پاکستان بزنس کمیٹی نا کنڈآن تروک آ دے انا اِرغ نا دود آن تران کریکہ ۔ داوخت آ جاپان پاکستان بزنس کوآپریشن کمیٹی نا ڈل اٹی میروبینی کارپوریشن ، ٹویوٹا موٹرز، سوزوکی موٹرز، متسوبشی، سومی ٹومو، یونیور سا آئی میٹلز و مٹسوئی تون اوار پنی آ جاپانی بزنس کارپوریشن تا نمائندہ غاک ہم ساڑی ئسر ۔ صدر مملکت معاشی ویل آتا مون ءِ توننگ کن کروک آ حکومت نا کوشست آتیان بشخ ہلوک آتے معلومدار کرے ۔ اوپارے کہ پاکستان آزادانہ زرکاری پالیسی آ عمل کننگ ءِ و زرکاری نا گچین وارخواہی فراوان کیک ۔ جاپانی کمپنیک پاکستان زرگزران نا چندی بشخ آتے ٹی دوئی کٹیا کروک وارخواہی تیان فائدہ ہرفر ۔ صدر مملکت جاپان نا پاکستان نا بھلا شونداری شریدار نا وڑاٹ کڑد انا ستاءِ کرے وپارے کہ پاکستان زرگزران نا غٹ بشخ آتے ٹی جاپانی زرکارآتے بخیر اٹ پاہک ۔ اوپارے کہ جاپانی کمپنیک پاکستان نا بھلا مارکیٹ اتون اوار اوار گیشتر علاقائی کاروباری وارخواہی تیان فائدہ ہرفنگ کن خصوصی اقتصادی زون تیٹی زرکاری کیر ۔ داوخت آ توانائی، فوڈ پراسیسنگ ، ماہی گیری، آٹوموبائل و کشت وکشار نا بشخ آتے ٹی زرکاری ءِ ودفنگ نا گمان آتیا ہم گپ و تران کننگا ۔ جاپانی کاروباریی راہشونک پاکستان نا اقتصادی گچینی نا اعتراف ءِ کرسا ہڑتوم آ ملک آتا نیام اٹ واپاری و زرکاری تعلقداری تے پین ودفنگ کن عملی گام گیج آتا است خواہی ظاہر کریر ۔ داکان مست صدر مملکت این ای سی نا ہیڈکوارٹرز نا دورہ ءِ کرے ہراڑے کمپنی نا کنڈآن تیار کروک آ پوسکن آ ٹیکنالوجیز و آخبت اٹی پاکستان اٹی زرکاری نا ڈٹ آتا بارواٹی اودے معلومدار کننگا ۔