وزیراعظم نا خصوصی کمکار امور نوجوانان عثمان ڈار نا پریس کانفرنس

سرسہب ورنا پروگرام نا ڈیجیٹل پورٹل آ 16لکھ سائبر جلہوآتے بے سہب کننگا، عثمان ڈار

اسہ لکھ 78 ہزار جلہو بھارت آن کننگا

پروگرام نا کمک اٹ وام تا دوئی کننگ کن 2,59,767درخواست ملانو

اسلام آباد ۔ 22اکتوبر (اے پی پی) وزیراعظم نا خصوصی کمکار امور نوجوانان عثمان ڈار پارینے کہ سرسہب ورناپروگرام نا کمک اٹ وام ہلنگ کن داوخت اسکان 2لکھ 59 ہزار 767درخواست ملانو، سرسہب ورنا پروگرام نا ڈیجیٹل پورٹل آ بھارت تون اوار ایلو ہیکر آک سائبر جلہو کرینو ہرافتے بے سہب کننگانے ۔ داخیال آتا درشانی ءِ او سے شنبے نادے آ داڑے پریس کانفرنس آن تران کرسا کرے ۔ اوپارے کہ وزیراعظم عمران خان نا پارت نا رداٹ سرسہب ورناپروگرام نا رداٹ شفاف وڑوڈول و میرٹ نا کمک اٹ وام تا فراوانی کن پوسکن ءُ ڈیجیٹل پلیٹ فارم اس ٹہیفنگانے ۔ ورناک بھلو کچ اسے ٹی آسان شڑت آتیا وام ہلنگ کن درخواست ترسا داپروگرام نا ستاءِ کرینو ۔ اوپارے کہ سرسہب ورنا پروگرام نا بنا آن ہلیس 2لکھ 59 ہزار 767درخواست ملانو وخت اس کہ ہردے 50 آن 80 ہزار نا نیام اٹ درخواست ملنگ ءِ ۔ اوپارے کہ سرسہب ورناپروگرام نا پورٹل آ 16لکھ سائبر جلہو مسنے ۔ دافتیان اسہ لکھ 78 ہزار سائبر جلہو بھارت آن کننگانے ہرافتے بے سہب کننگانے ۔ این ٹی سی نا انتظامیہ دا پورٹل کن رکھ و فول پروف نظام اس جوڑ کرینے ۔ اوپارے کہ تدوک آ 5سال اٹی وام ہلنگ کن 90 ہزار ورناک درخواست تسوسر انتئے کہ ہمووخت خلقت ءِ چِراٹ سلوک بینک آتے ٹی درخواست جمع کرفوئی تماکہ ولے داسہ مچ آ ملک آن ورناک وام ہلنگ کن آن لائن درخواست جمع کرفنگ کیرہ ۔ عثمان ڈار پارے کہ ورناتے 45پسماندہ ضلع غاتے ٹی 10 ہزار آن اسہ لکھ اسکان بے سود وام تننگک ۔ اسہ لکھ آن 5لکھ روپئی اسکان نا وام تیا شرح سود 6 درسد مریک وخت اس کہ 5لکھ آن 50 لکھ روپئی اسکان وام تیا 8 درسد مریک ۔ اوپارے کہ ایکسٹرنل ایجنسی درخواست تروک آنا بابت معلومداری ہلیک وخت اس کہ درخواست نا سکور کارڈ اس ہم جوڑ کننگک ۔ اوپارے کہ ورناتے سیاسی نیام تمنگ آن بیدس میرٹ آ وام تننگک ۔ بینک آتے وام تا فراوانی نا عمل ءِ پورو کننگ کن 45آن 50 دے انا ڈیڈ لین تننگانے ۔ اومیت ءِ کہ دسمبر آن ورناتے ٹی وام تا پیسہ غاتے بشخنگ بناکیک ۔ اوپارے کہ پہلے آئیے پہلے پائیے نا بنداو آ وام تننگک ۔ سرکاری ملازم آتون اوار 21آن 45سال اسکان نا غٹ پاکستانی شاریک وام ہلنگ کن درخواست تننگ کیرہ ۔ اوپارے کہ داپروگرام نا اولیکو مرحلہ ٹی زالبول آتے کن 25ارب روپئی جتا کننگانے وخت اس کہ ایلو مرحلہ ٹی اقلیت و معذور بندغ آتے کن ہم کوٹہ اس جتا کننگک ۔ داوخت آ نیشنل انفارمیشن ٹیکنالوجی بورڈ انا کمامدارآک وزیراعظم نا خصوصی کمکار امور نوجوانان ءِ پروگرام نا بابت حوال تسر ۔