نیب ہروڑنا وڈی خوری ءِ ماس کش کننگ کن پرعزم ءِ، جسٹس (ر) جاوید اقبال

اسلام آباد ۔ 22اکتوبر (اے پی پی) قومی احتساب بیورو (نیب) انا چیئرمین جسٹس (ر) جاوید اقبال پارینے کہ نیب ہروڑنا وڈی خوری ءِ ماس کش کننگ کن پرعزم ءِ، میگا کرپشن واءٹ کالرکرائمز نا مقدمہ غاتے ایسر اسکان سرکننگ نیب انا اولیت ءِ، نیب وڈی خور عنصر آتے کانود نا کٹہرہ ٹی اتنگ کن ’’احتساب غٹ انا‘‘ نا پالیسی آ عمل کننگ ءِ ۔ نیب ہیڈ کوارٹر اٹی ادارہ نا جم کارکڑدگی نا بابت جاچ دیوان نا کماشی ءِ کرسا اوپارے کہ نیب انا آگاہی ، تدارک و کانود آ عملدرآمد آ پالیسی نا شاندار بھرم مون آ بسنے ۔ اوپارے کہ نیب بھلو کچ اسے آ خلقت تون دروکننگ اٹ لٹ و پل ، مالی کمپنی تیٹی فراڈ، منی لانڈرنگ ، بینک فراڈز، واک آتا ناروا کاریم اٹ اتنگ و سرکاری ملازم آتا کنڈآن سرکاری فنڈ اٹی نغڑد نا مقدمہ غاتے اولیتی بنداو تیا چٹفک ۔ اوپارے کہ نیب اونا کماشی ٹی تدوک آ 23تُو اٹی وڈی خور عنصر آتیان 71 ارب روپئی ہلکونے ہرا اسہ نمان سرسہبی اسے ، نیب ادارہ جاتی خامی، آپریشن ، پراسیکیوشن ، انسانی وسیلہ غاتا شونداری ، آگاہی و تدارک تون اوار غٹ بشخ آتا سرجم جاچ آن پد جم وڑوڈول اٹ اصلاحات کرینے ہراڑان نیب فعال ادارہ اس جوڑ مسنے ۔ چیئرمین نیب پارے کہ نیب تینا قیام آن ہلیس داوخت اسکان وڈی خوری نا 1230 ریفرنس تعلقدار احتساب عدالت آتے ٹی دائر کرینے و کم و ود 300 ارب روپئی ہلسا قومی خزانہ ٹی جمع کرفینے، نیب ءِ 2018ء نا مقابلہ ٹی 2019ء ٹی دوگنا غاو ملانے، تدوک آ 23تُو انا حساب وکتاب نا جاچ آن دا پاش مریک کہ نیب انا غٹ آفیسر آک سخت خوری و لگن اٹ کاریم کننگ ءُ و وڈی خوری نا چٹفنگ ءِ تینا قومی فرض سرپند کرسا ادا کننگ ءِ ، نیب اٹی غاو تیٹی ودکی نیب آ الس نا پت انا درشانی ءِ ۔