وزیراعظم نا خصوصی کمکار جان جوڑی ڈاکٹر ظفر مرزا اوٹی بشخ ہلیک

پاکستان انسٹیٹیوٹ آف میڈیکل سائنسز اٹی آگاہی بریسٹ کینسر نا بابت (اینو) سیمینار واک اس مریک

اسلام آباد ۔ 22اکتوبر (اے پی پی) پاکستان انسٹیٹیوٹ آف میڈیکل سائنسز (پمز) اٹی آگاہی بریسٹ کینسر نا بابت (اینو) چارشنبے آ سیمینار و واک اس اڈ تننگک ۔ پمز انا ترجمان ڈاکٹر وسیم خواجہ نا رداٹ آگاہی سیمینار 11ءُ نیم بجہ غا بریسٹ کینسر سکریننگ سینٹر پمز ہسپتال اٹی اڈ ہلیک ۔ او پارے کہ سیمینار و آگاہی واک اٹی وزیراعظم نا خصوصی کمکار جان جوڑی ڈاکٹر ظفر مرزا بطور مہمان خاص بشخ ہلیک، آگاہی سیمینار و واک انا اڈتننگ نا مسخت زالبول اٹی بریسٹ کینسر کون آ ناجوڑی تیان بچفنگ و احتیاطی تدابیر نا بابت معلومدار کننگ نا ءِ انتئے کہ ہراکہ ناجوڑی مرے اونا توننگ کن ہمو ناجوڑی نا بنائی کہول آ علم مننگ المی ءِ ۔ داکان بیدس پاکستان اٹی سینہ نا کینسر اٹی ترندی اٹ ودکی مننگ ءِ ، ہرسال 90 ہزار زالبول بریسٹ کینسر نا مرض اٹی اختہ مریرہ ہرافتیان 40 ہزار زالبول نا مرک واقع مریک ۔ 20 آن 40 سال انا وئی نا زالبول آک بیدس سوب اسے نا کلینیکل چھاتی نا جانچ پڑتال و ہر مسہ سال آن پد میمو گرافی بایدے کرفر ۔ سینہ نا کینسر نا ویل آتیان بچفنگ کن ننے تینا کُننگ نا عادت آتے ہم بدلیفوئی مریک تاکہ نن اسہ جوان ءُ زند اس تیر کننگ کین ۔