مصنوعی ذہانت نا بشخ اٹی پاکستان و جاپان نا نیام اٹ کمکاری ءِ سوگو کننگ نا گرج ءِ، صدر مملکت ڈاکٹر عارف علوی

اسلام آباد ۔ 21اکتوبر (اے پی پی) صدر مملکت ڈاکٹر عارف علوی پارینے کہ مصنوعی ذہانت نا بشخ اٹی پاکستان و جاپان نا نیام اٹ کمکاری ءِ سوگو کننگ نا گرج ءِ ، پاکستان نا نیم آن زیات آبادی ورناتیا تالان ءِ ہرانا سوب دا بشخ اٹی مون آ ہِننگ نا بے پناہ گمان ارے ۔ جاپانی ٹی وی نیوز 24(این ٹی وی) ءِ تروک آ اسہ انٹرویو اسے ٹی صدر مملکت پارے کہ ای جندی کوشست آتیان مصنوعی ذہانت نا بشخ اٹی تربیتی نظام اس بناکریٹ ہرانا رداٹ اِراسال اٹی اسہ لکھ مصنوعی ذہانت نا چاہندار تیار کننگک ۔ صدر مملکت ڈاکٹر عارف علوی حکومت جاپان نا سلہ غا جاپان نا شہنشاہ ناروہیٹو نا تاج پوشی نا دود انا چرجوئی ٹی جاپان نا دورہ غاٹے، صدر مملکت جاپان نا سافٹ ویئر کمپنی تے سلہ خلک کہ او پاکستان آ بریر زرکاری کیر ۔ اوپارے کہ سافٹ ویئر ڈویلپمنٹ و آرٹیفیشل انٹیلیجنس ڈویلپمنٹ اٹی اوفتے بے پناہ پذیرائی ملنگ کیک ۔ اوپارے کہ پاکستان اٹی جاپان نا زرکاری کن بھاز انگا بشخ آک ءُ خاص وڑاٹ سافٹ ویئر نا تیاری ٹی اوفتے بھاز زیات فائدہ مننگ کیک ۔ اوپارے کہ داوڑاٹ جاپانی کمپنی تا کنڈآن پاکستان اٹی زرکاری نا پوسکن ءُ درگہ ملنگک ۔ اوپارے کہ پاکستان آبادی نا لحاظ اٹ دنیا نا پنچ می بھلا ملک ءِ ہرا اسہ بھاز بھلو مارکیٹ اس ہم ارے ۔ بھارتی مقبوضہ جموں و کشمیر نا بابت صدر مملکت پارے کہ ہموڑے حالیت آک بھاز خراب ءُ و بھارتی سرکڑدہ غاتا کنڈآن اختیار کروک آ چم آک دا حالیت آتے ٹی پین بگاڑ نا سوب مریرہ ۔ اوپارے کہ پاکستان امن پسند ءُ ملک اسے و او مذاکرات نا کمک اٹ غٹ ویل آتا ایسری خواہک ۔ پاکستان امن و مذاکرات خواہک ۔ داوخت آ صدر مملکت پاکستان وجاپان نا نیام اٹ تعلقداری تے پین سوگو کننگ نا است خواہی نا ہم درشانی ءِ کرے ۔ اوپارے کہ کنے جاپان نا دودوربیدہ و تاریخ تون بھاز لگاءو ءِ ہراتم کہ جاپان آ بریوہ یا پاکستان اٹی جاپانی مخلوق تون ملیوہ تو کنے مدام مہر و مریبت، شگفتگی ، وضع داری و خوشی نا احساس مریک ۔ ای جاپانی تا دھیمہ پن و رکھ رکھاءو ءِ بھاز پسند کیوہ ۔ تاج پوشی نا دود اٹی بشخ ہلنگ کنکن خوشی و شرف نا سوب ءِ دا داجاگہ نا متکن ءُ روایت اسے ۔