اسلام آباد۔ 10 فروری (اے پی پی) آپریشن ضرب عضب اٹی زہمی مروک آ قطبی وزیرستان نا بے اُرا بندغ آئی ڈی پیز آتا پدی ہِننگ نا عمل برجاہ ئِ داوخت اسکان 80 ہزار 584خاہوت پدی تینا علاقہ غاتیا رسینگانو۔ فاٹا نا ترجمان محمد علی خان جمعہ آ اے پی پی تون خصوصی ہیت وگپ کرسا اوپارے کہ دہشت گردی نا برخلاف برجاہ آپریشن ضرب عضب اٹی زہمی مروک آ قطبی وزیرستان تون اوار فاٹا نا بے اُرا بندغ آتا پدی ہِننگ ناعمل ترندی اٹ برجاہ ئِ داوخت اسکان 80 ہزار 584خاہوت قطبی وزیرستان نا پدی تینا باوہ و پیرہ ہی علاقہ غاتیا رسینگانو۔ پدی ہنوک آ بے اُرا بندغ آتے موبائل سم انا کمک اٹ 25ہزار کیش گرانٹ، 10 ہزار روپئی کرایہ نا مد اٹی تننگ انگ ئِ۔ اوپارے کہ پدی ہنوک آ خاہوت آتے ورلڈ فوڈ پروگرام نا کمک اٹ 6تو نا مفت راشن تننگ انگ ئِ وخت اس کہ یخ آن بچنگ کن تمبو،باسن ئُ کمبل ہم بے اُرا بندغ آتے پدی ہِننگ نا وخت آ تننگ انگ ئِ۔
