اسلام آباد۔ 10 فروری (اے پی پی) حکومت چین پاکستان اقتصادی راہداری نا خصوصی اقتصادی زون نا بابت معاملہ غاتیٹی کمکاری کن زرکاری بورڈ اسلام آباد اٹی اسہ سیل اس اڈ تسنے۔ مچ آ ملک اٹی داوخت اسکان 41خصوصی اقتصادی زون تا پیدواری کننگانے ہرافتیان اسٹ اسٹگلگت بلتستان ، آزاد کشمیر و اسلام آباد اٹی اوار ئُ۔ سندھ اٹی خیر پور خصوصی اقتصادی زون، کورنگی کریک انڈسٹریل پارک و بن قاسم انڈسٹریل پارک ، پنجاب اٹی قائد اعظم اپیرل پارک شیخوپورہ ، ایم تھری انڈسٹریل سٹی فیصل آباد، ویلو ایڈڈسٹی فیصل آباد و خیبر پختونخوا اٹی حطار اقتصادی زون ہری پور اوار ئُ۔ جمعہ آ وزارت ڈٹ بندی و شونداری نا کمامدارآک ”اے پی پی“ ئِ پاریر کہ شش می جے سی سی دیوان اٹی پاک چین صنعتی کمکاری نا بشخ اٹی کاریم ئِ پین ترند کننگ نا فیصلہ کننگا۔ پاک چین صنعتی کمکاری نا رداٹ صوبہ غاتا کنڈآن گچین 9زون تا اوار مننگ نا فیصلہ مس۔ دا مسخت کن صوبہ غاک کیہی ہند آتا پیدواری ئِ کریسر ہرافتے ٹی خیبر پختونخوا نا کنڈآن رشکئی اکنامک زون و سندھ انا کنڈآن چائنہ اکنامک زون داریجی، بلوچستان نا کنڈآن بوستان اکنامک زون و پنجاب نا کنڈآن چائنہ اکنامک زون شیخوپورہ، گلگت بلتستان نا کنڈآن مقپو نداس گلگت وخت اس کہ کشمیر نا کنڈآن بھمبر صنعتی زون ئِ اوار کننگ نا سلاہ تننگاسس، دارالحکومت اسلام آباد اٹی آئی سی ٹی ماڈل انڈسٹریل زون و پورٹ قاسم اٹی پاکستان اسٹیل میل نا ڈغار آ انڈسٹریل پارک جوڑ کننگ وخت اس کہ فاٹا نا کنڈآن صنعتی زون اڈتننگک۔ اوفک پاریر کہ گوادرفری زون و پورٹ ڈویلپمنٹ نا کیہی ڈٹ و گوادر ووکیشنل انسٹی ٹیوٹ نا جوڑ جاڑی کاریم ئِ پین ترند کننگ نافیصلہ کننگانے۔ اوفک پاریر کہ گوادر فری زون اٹی زرکاری نا چرجوئی نا بناءمسنے ہراڑے اسٹیل ، پٹرو کیمیکلز و ایلو صنعت آتا اڈتننگ آ کاریم نا بناءمسنے۔
