چائنہ پاکستان اقتصادی راہداری آن پد سمندری گزرگاہ تیا ودوک آانحصار نا سوب سمندراٹی ڈک چاگڑد ئِ برقرار تخنگ نا گرج ئِ
پاکستان نیوی گیشن نا آجوئی، کانودی سمندری نظام ئِ المی جوڑ کننگ نا عزم کرینے
اسلام آباد۔ 10 فروری (اے پی پی) وزیراعظم محمد نواز شریف کثیر الاقوامی سمندری مشق امن۔17 نا ساڑی مروک آتا جم وجوش اٹ خیرمقدم ئِ کرسا پارے کہ اودے داہیت آ خوشی ئِ کہ مشق آتا امن سیریز نا کمک اٹ پاک بحریہ دے ٹک و دیکی نا بحری فوج آتے اسہ پلیٹ فارم اسے آ یکجا کرسا سمندری دنگ اٹی اسہ پول اس اڈتننگ اٹی سرسہب مسنے۔ پاک بحریہ نا ملٹی نیشنل ایکسر سائز امن۔17 نا وخت آ تینا اسہ کلہو اسے ٹی وزیراعظم پارے کہ چائنہ پاکستان اقتصادی راہداری تون پاکستان نا جیوسٹریٹجک اہمیت ڈیہہ کن اسہ گیم چینجراس جوڑ مریک۔ دا بھلا ڈٹ علاقائی و بین الاقوامی معاشی شونداری نا پبی گمان خاص کر بحری بشخ اٹی شونداری نا حامل مریک۔ زبردست معاشی فائدہ غاتون سمندری گزرگاہ تیا ودوک آ انحصار نا سوب سمندر اٹی ڈک چاگڑد ئِ برقرار تخنگ نا گرج ئِ۔ اوپارے کہ بحر ہند اٹی میری ٹائم سیکورٹی چیلنج آک کثیرالجہتی ئُ سمندری دہشت گردی ، منشیات نا اسمگلنگ و سرقہ کون آ خلیس آتون مون تننگ کن جہانی کوشست آتا گرج ئِ و دا خلیس آتا چٹفنگ کن جہانی بحری فوج انا نیام اٹ کمکاری نا گرج ئِ اوپارے کہ پاکستان ہرا بحیرہ عرب اٹی سمندری سیکورٹی نا اسہ بھلا سٹیک ہولڈر ئِ ، نیوی گیشن نا آجوئی و کانودی سمندری نظام ئِ المی جوڑ کننگ نا پورو عزم کرینے۔ اوداپت انا درشانی ئِ کرے کہ مشق امن۔17 دا سمت اسہ بھلو جہد اس مریک۔ وزیراعظم بھلو کچ اسے ٹی امن۔17مشق اٹی ساڑی کننگ آ کیہی ملک آتا بحری فوج اتون منت واری نا درشانی ئِ کرے و 2007 ءآن پد آن مشق آتا امن سیریز نا سرسہب اڈتننگ کن پاک بحریہ نا جوزہ اتون کوشست آتا ستائِ کرے۔ اومشق انا سرسہبی کن تینا نیک است خواہی تا درشانی ئِ کرے و امن نا مون آ دننگ کن داٹی بشخ ہلوک آ غٹ ملک آتا منت واری ئِ ادا کرے۔
