اسلام آباد ۔ 10 فروری (اے پی پی) مزن وزیرمحمد نواز شریف ئَ گوشت کہ بُنجاھی حکومت سندھ ئِ کوچگی دمگ ئُُ شہری دمگ آناں دیمروئی دیگ ئِ دلگوش ئَ آں۔ ھاٹیگ ، انفراسٹرکچر ئُُ چاگردی شوبگ ئَ ھوار سندھئِ اُلس ئِ ھاترا بازیں مصوبگ بندات کتگ۔ توامیں شریکدار آں گوں تپاکی منوگری ئِ پد ئَ کراچی ئَ ایمنی ئِ برجائی ئِ ھاترا گامگیج چست کتگ ئُُ اللہ پاک ئِ مہروبانی ئَ جاور ھال دیم پہ جوانی ئَ پیداک اَنت۔ آئی ئَ اے گپ گورنر سندھ محمد زبیر ئَ گوں آدینگ ئِ روچ ئَ مزن وزیر گس ئَ تران کنان ئَ کُت اَنت۔ مزن وزیر ئَ گوشت کہ بُنجاھی حکومت پورٹ قاسم پاور پلانٹ۔ اینگروتھپاور پراجیکٹ، جھم پیر ونڈ پاور پراجیکٹ ئُُ تھرمائن ماﺅتھ اوریکل پراجیکٹ ئَ ھوار سندھ ئَ بازیں ھاٹیگ ئِ منصوبگ آنی سر ئَ کار جاڑی اِنت۔ آئی ئَ دلیکیمی دات کہ گوستگیں ھپتگ ئَ آئی ئَ سندھ ئِ اُلس ئِ آسراتی ئِ ھاترا کراچی ئَ چہ حیدر آباد موٹروے ئِ سرجمی ئِ ھاترا ایم نائن سیکشن ئِ بُنگیج کتگ۔ مزن وزیر ئَ گوشت کہ ما کراچی سرکلر ریلوے منصوبگ ئَ را سی پیک ئَ ھوار کتگ ئُُ گرین لائن ماس ٹرانزٹ منصوبگ ئِ سر ئَ گوں ترندی ئَ کار برجا اِنت۔ مزن وزیر ئَ گوشت کہ بُنجاھی حکومت ئِ نیمگ ئَ فور ئُُ لیاری ایکسپریس وے منصوبگ ئِ ھاترا کمک پجارینگ بوھگ ئَ اِنت۔ مزن وزیر ئَ گوشت کہ گورنر سندھ ئَ را بُنجاھی حکومت ئُُ سندھ حکومت ئِ نیام ئَ کمکی بستار ئَ کار کنگ لوٹیت تانکہ دیمروئی گامگیج آنی سر ئَ گیشینتگیں وھد ئُ پاس ئَ سرجمی بہ بیت۔ گورنر سندھ ئَ دلیکیمی ئِ درشان ئِ پد ئَ مزن وزیر ئِ شگر ئُُ منت گپت ئُُ گوشت کہ آ سندھ ئِ اُلس ئِ نپ ئِ ھاترا وتی زمہ واری آں پیلو کنت ئُُ بُنجاھی ئُُ صوبائی حکومت ئِ نیام ئَ یکوئی ئَ را گیش مھکم کنت۔
