کوئٹہ۔ 06مئی (اے پی پی) صوبائی وزیر جان جوڑی رحمت صالح بلوچ پارینے کہ نیشنل پارٹی اسہ جمہوری و پرامن و عدم تشدد آ یخین تخوک ئُ سیاسی جماعت اسے ہرا بلوچستان نا ساحل و وسیلہ غاتا رکھ و الس نا اجتماعی ویل آتا ایسری کن جمہوری وڑاٹ پبی جہد کننگ ئِ۔ داخیال آتا درشانی ئِ او جمعہ آ بلوچ اسٹوڈنٹس آرگنائزیشن پجار نا مسکوہی بنجائی سینئر جوائنٹ سیکرٹری عقیل پرویز بلوچ نا نیشنل پارٹی ٹی اوار مننگ نا وخت آ کوئٹہ پریس کلب اٹی پریس کانفرنس آن تران کرسا کرے۔ داوخت آ بی ایس او پجار نا بنجائی چیئرمین اسلم بلوچ ، حاجی عطاءمحمد بنگلزئی و علی احمد لانگو ہم ساڑی ئسر۔رحمت صالح بلوچ عقیل پرویز بلوچ نا نیشنل پارٹی ٹی اوار مننگ نا خیر مقدم ئِ کرسا پارے کہ نیشنل پارٹی انسانیت نا خذمت آ باور کیک و بلوچستان نا اڈ ہلوک مخلوط صوبائی حکومت نا اصول آتا بنداو آ بشخ اسے ۔ اوپارے کہ بلوچستان نا ساڑی آ صوبائی حکومت امن و ایمنی ، تعلیم و جان جوڑی نا بشخ آتے ٹی نمان سرسہبی دوئی کرینے۔ داوخت آ بی ایس او پجار نا بنجائی چیئرمین اسلم بلوچ عقیل پرویز بلوچ ئِ نیشنل پارٹی ٹی اوار مننگ آ اودے مبارکباد پیش کرسا پارے کہ عقیل پرویز بلوچ نا نیشنل پارٹی ٹی اوار مننگ اہم مزل اس ثابت مریک وخت اس کہ پنجگور اٹی رحمت صالح بلوچ و نیشنل پارٹی نا راہشون و کارندہ غاک بامساعدہ حالیت آتا مقابلہ ئِ کریر و علاقہ ٹی تاریخی شونداری کاریم کرفیر ہرافتا کارکڑد نابدولت داسا نیشنل پارٹی پنجگور و بلوچستان نا فعال سیاسی و منظم جماعت اس جوڑ مسنے۔
