اسلام آباد۔ 08 فروری (اے پی پی) وزیر مملکت نیشنل ہیلتھ سروسز، ریگولیشنز اینڈ کوآرڈینیشن سائرہ افضل تارڑ پارینے کہ رکھی ٹیکہ غاتا قومی پروگرام لمہ و چنانا جان جوڑی نا رکھ اکن کلیدی کڑد ادا کننگ ئِ و وزارت قومی جان جوڑی دا پروگرام کن وسیلہ غاتا فراوانی ئِ المی جوڑ کننگ نا ہر حد اسکان کائک۔ رکھی ٹیکہ غاتا پروگرام نا سالانہ جاچ دیوان نا کماشی ئِ کرسا اوپارے کہ پروگرام نا کارکڑد نا سرجم اٹ جاچ ئِ ہلنگ المی ئِ تانکہ دا نا کارکڑد ئِ گچین جوڑکرسا اونا رسینگ ئِ پاکستان نا ہر چناو حاملہ لمہ غاتسکان المی جوڑ کننگ مرے۔ اوداہیت آ است جمی نا درشانی ئِ کرے کہ ملک اٹی رکھی ٹیکہ غاتا رسینگ اٹی خاطرخواہ گچینی مسنے ہرانا اعتراف ئِ جہانی ادارہ غاک کرینو۔ اوپارے کہ قومی و صوبائی کہول آ دا پروگرام کن وسیلہ غاتا بلا تعطل فراوانی کن نیشنل ایمونائزیشن سپورٹ پروگرام جاری کننگانے۔ دا پروگرام نا رداٹ صوبہ غاک تینا پی سی ون اس جوڑ کرینو ہرا اسہ است جم ئُ ہیت اسے۔ اوداہیت آ زورشاغا کہ درکار نتیجہ غاتا دوئی کن ای پی آئی و پولیو پروگرام ئِ اواری اٹ کاریم کروئی مریک۔ وزیر قومی جان جوڑی رکھی ٹیکہ غاتا پروگرام نا بابت صوبائی حکومت آتیا زور شاغا کہ او الس کن آگاہی ہمہ نا اجراءئِ کیر۔ داوخت آ اوپارے کہ ویکسین نا رکھ ترسیل نا نظام نا آزادانہ آڈٹ کرفنگانے ہرانا است جم نتیجہ دوئی مسنے۔ اوصوبائی حکومت آتے ای پی آئی کارکڑد گچین جوڑ کننگ کن ہروڑنا کمکاری نا باوری ترفے تانکہ داپروگرام نا کمک اٹ لمہ و چنانا مرک آتا کچ ئِ کم کننگ مرے۔ او جہانی ادارہ بشمول گاﺅی، یو ایس ایڈ، بی ایم جی ایف، جائیکا ، ورلڈ بینک، یونیسیف و ڈبلیو ایچ او نا داپروگرام نا پدریسہ کمکاری آ منت واری ئِ ادا کرے۔
