نیویارک۔ 25 ستمبر (اے پی پی) وزیر خارجہ مخدوم شاہ محمود قریشی اقوام متحدہ جنرل اسمبلی نا 74می دیوان نا وخت آ آئر لینڈ نا وزیر خارجہ و واپار سائمن کوفینی تون اوڑدہی کرے۔ اوڑدہی ٹی مقبوضہ جموں و کشمیر نا حالیتت و اہم علاقائی و جہانی معاملہ غاتیا گپ و تران کننگا۔ داوخت آ شاہ محمود قریشی پارے کہ پاکستان، آئر لینڈ تون تینا ہڑتوم آ کنڈآتا تعلقداری تے بے کچ اہمیت ایتک۔ آئر لینڈ اٹی بھاز انگا پاکستانی ڈاکٹرز، آئی ٹی چاہندار و کاروباری شخصیت آک ملکی جوڑ جاڑ و شونداری ٹی کڑد ادا کننگ ءُ۔ مقبوضہ جموں و کشمیر نا خلقت بے کچ ڈکھیا حالیت آتون مون تننگ ءُ، ہراڑے بھارتی حکومت زوراکی اٹ آبادی تناسب ءِ بدل کننگ اٹ لگوک ءِ۔ اوپارے کہ ہندوستان مچ آ مقبوضہ جموں و کشمیر ءِ جیل اٹ بدل کرینے و ہموڑے نہہ لکھ فوجی تعینات کرسا کودک کشمیری تے ظلم و بربریت نا شست کننگ انگ ءِ۔ بھارت نا کنڈآن مقبوضہ جموں و کشمیر اٹی کروک آ اسہ کنڈی و غیر آئینی گام گیج، اقوام متحدہ نا سیکورٹی کونسل نا قرارداد و جہانی کانود نا پاش خلاف ورزی ءِ۔ وزیر خارجہ پارے کہ مقبوضہ جموں و کشمیر اٹی تدوک آ پنجادے آن جاری کرفیو نا سوب دوائی و خور انا بھاز کاختی مون تروک ءِ۔ آئر لینڈ تون اوار جہانی برادری ءِ ڈیہہ ٹی ودی مروک دا انسانی المیہ نا توننگ کن تینا گچین کڑد ءِ ادا کروئی مریک۔
