نیویارک۔ 25ستمبر (اے پی پی) وزیر خارجہ مخدوم شاہ محمود قریشی میر پور اٹی زمی جمب آن جانی و مالی نسخان آ ڈکھ و است ہسونی نا درشانی ءِ کرسا پارینے کہ نن غٹ داڑااست گرفتہ اُن، وزیراعظم عمران خان ہم بھاز ڈکھیا ءِ، بنجائی حکومت، آزاد کشمیر نا حکومت و نیشنل ڈیزاسٹر مینجمنٹ اواری اٹ زمی جمب نا گواچی مروک آتا کمک ءِ کیر۔ چارشنبے نادے آ تینا خصوصی ویڈیو کلہو اٹی اوپارے کہ ای داوخت آ نیویارک اٹی اُٹ کنے داسہ حوال ملانے کہ میر پور اٹی زمی جمب آن جانی و مالی نسخان مسنے۔ نن غٹ داڑا دل گرفتہ اُن وزیراعظم عمران خان ہم بھاز ڈکھیا ءِ۔ اوپارے کہ ننا کوشست ءِ کہ بنجائی حکومت، آزاد کشمیر نا حکومت و نیشنل ڈیزاسٹر مینجمنٹ اواری اٹ زمی جمب نا گواچی مروک آتا دمدستی کمک ءِ کیر۔ نن داڑے اقوام متحدہ جنرل اسمبلی ٹی کشمیری تا مقدمہ ءِ کننگ کن بسونن داوخت اٹی دا ڈکھیا خبر نا مون آ بننگ بھاز است ہسونی نا سوب ءِ۔ اللہ تعالیٰ زمی جمب اٹی زوال کروک آتے جنت الفردوس اٹی جاگہ ایتے و ٹھپی مروک آتے زوت جان جوڑ کے۔
