جنیوا۔ 25ستمبر (اے پی پی) اقوام متحدہ نا سیکرٹری جنرل انتونیوگوترس پارینے کہ 77 ملک آک گرین ہاؤس گیس آتا اخراج اٹی کمتی و 2050ء اسکان دادے زیرو آ اتنگ کن گام گیج آتیا امنا کرینو، وخت اس کہ کچٹی تالان کننگ نا بھلا زموار ملک آک امریکہ، چین، جاپان و بھارت داڑا ولداانکار کرینو۔ جنیوا ٹی اقوام متحدہ نا کلائمیٹ ایکشن سمٹ نا ایسری سیشن آن تینا تران اٹی سیکرٹری جنرل جہانی حدت اٹ کمتی کن خصوصی گام گیج آتا پڑو ءِ کرے۔ دا گام گیج آتے ٹی قابل تجدید توانائی نا زیات کاریم اٹ اتنگ و شون ہلوک ملک آتے کن مالی امداد اوار ءِ۔ 60 آن زیات ملک آتا سروک و وزیر آک دا سروک دیوان اٹی بشخ ہلکر۔ سیکرٹری جنرل پارے کہ فرانس و جرمنی تون اوار 77 ملک آک کاربن اٹی است خواہی ءِ چٹفنگ یا 2050ء اسکان کاربن نا اخراج ءِ زیرو کننگ نا عہد ہم کریر ولے گرین ہاؤس گیس آتا بھلا اخراج کنندہ بشمول امریکہ، چین و بھارت کاربن نااخراج ءِ کم کننگ نا وعدہ کتوس وخت اس کہ جاپان تون اوار بھاز انگا ایلو ملک آک ہم دیوان نا وخت آ تینا خصوصی گام گیج آتا پڑو ءِ کتوس۔ اوپارے کہ دنیا آب و ہوا نا ویل آتا برخلاف جنگ ءِ باتسکہ ولے داسہ دا ترندی اٹ بیدار مننگ ءِ۔
