اسلام آباد۔ 07 فروری (اے پی پی) پارلیمانی سیکرٹری خزانہ رانا محمد افضل خان پارینے کہ پوسکن آ مردم شماری کن جوڑ کروک آ فارم اٹی معذور بندغ آتا خانہ درج ئِ، باوری ایتیوہ کہ مردم شماری ٹی اگہ کمیونٹی اسے نا زہمی مننگ نا گمان مس تو دا بابت دمدستی گام گیج ہرفنگک۔ سے شنبے آ قومی اسمبلی ٹی شائستہ پرویز ملک نا قومی مردم شماری نا فارم اٹی معذور بندغ آتا کالم مفننگ نا بابت توجوہ مبذول نوٹس نا ورندی ئِ ترسا پارلیمانی سیکرٹری خزانہ رانا محمد افضل خان پارے کہ مشترکہ مفادات کونسل اٹی مردم شماری نا فیصلہ مس۔ دا اسہ مریس ئُ ایکسر سائز اسے ہراٹی پاک فوج و شماریات ڈویژن نا عملہ نا کمک درکار مریک۔ گچین جہانی نمونہ غاتے مون آ تخسا اِرا فارم ہم فارم اے و فارم 2۔ اے جوڑ کننگانے ، ارٹ میکو فارم اٹی معذور بندغ آتا خانہ ساڑی ئِ ۔ کالم نمبر 31و کالم نمبر 32اٹی معذوری نا وڑ و سوب آن تعلقدار سرجم آک درکار مریرہ۔ توجوہ مبذول نوٹس آ شائستہ پرویز ملک ، محمد پرویز ملک، شاہدہ رحمانی و شزہ فاطمہ خواجہ نا سوج آتا ورندی ٹی پارلیمانی سیکرٹری خزانہ رانا محمد افضل خان پارے کہ نن دا فارم آتے داخاطران بدل کننگ خواپنہ انتئے کہ دا جہانی معیار ئِ مون آ تخسا ترتیب تننگانو۔ دا فارم آتیٹی روزگار، بے روزگاری، خواندگی تون اوار ایلو غٹ سرجم آتا ذکر ارے۔ اسہ پین سوج اسے نا ورندی ٹی اوپارے کہ پیدائشی معذوری و حادثاتی معذوری ہڑتوم آ تیا حکومت نا پبی چکار ئِ۔ دابابت ایس ڈی جیز نا رداٹ کاریم مننگ ئِ۔ او باوری ترفے کہ مردم شماری ٹی اگہ کمیونٹی اسے نا زہمی مننگ نا گمان مس تو دابابت دمدستی گام گیج چست کننگک۔
