گیشتر سیاسی جماعت آک فاٹا اصلاحات نا پبی مخ تفی نا پڑو ئِ کرینو، شاہ جی گل آفریدی

اسلام آباد۔ 07 فروری (اے پی پی) فاٹاآن باسک قومی اسمبلی شاہ جی گل آفریدی پارینے کہ فاٹا کنونشن اٹی غٹ سیاسی جماعت آک بشخ ہلسا فاٹااصلاحات نا بابت تینا موقف ئِ تسر۔ سیاسی راہشونک اسہ ایلو نا برخلاف غیر پارلیمانی زبان ئِ کاریم اٹ اتپس۔ سے شنبے آ پارلیمنٹ ہاﺅس نا پیشن میڈیا تون ہیت وگپ کرسا اوپارے کہ فاٹا ٹی اصلاحات ناعمل نا بابت فاٹا کنونشن اڈتننگا ہراٹی غٹ سیاسی جماعت آک تینا تینا نقطہ نظر ئِ پیش کریر۔ عوامی نیشنل پارٹی نا سروک اسفند یار ولی فاٹا ہم اصلاحات نا مخ تفی ئِ کرینے۔ اوپارے کہ فاٹا ئِ صوبہ اس جوڑ کننگ و فاٹا اصلاحات نا بابت بیرہ اِرا جماعت اعتراض کننگ ئُ ہرافتے ٹی جمعیت علمائے اسلام و پختونخوا ملی عوامی پارٹی اوار ئُ۔ ایلو غٹ سیاسی جماعت آک فاٹا اصلاحات نا پبی مخ تفی نا پڑو ئِ کریر۔ اوپارے کہ قبائلی الس جمہوریت پسند ئُ۔ او تینا حق دوئی کننگ کن تینا جہدئِ برجاہ تخرہ۔ اسہ سوج اسے نا ورندی ٹی اوسیاسی راہشون آتا کنڈآن اسہ ایلو نا برخلاف غیر پارلیمانی زبان ئِ کاریم اٹ اتنگ درست اف الس ننے ویل آتا ایسری کن پارلیمنٹ اٹ گدریفینے۔