کے الیکٹرک نا ٹیرف آ نظرثانی نا معاملہ نیپرا ٹی زیر سماعت ئِ، فیصلہ نا انتظار ئِ کننگے

پارلیمانی سیکرٹری چوہدری جعفر اقبال نا قومی اسمبلی ٹی توجوہ مبذول نوٹس آ ورندی
اسلام آباد۔ 07 فروری (اے پی پی) قومی اسمبلی ئِ پاننگانے کہ کراچی نا بجلی صارف آتے کن بجلی نا ٹیرف نا معاملہ نیپرا تون زیر سماعت ئِ ، اگہ کراچی نا بجلی صارف آتا حق ثابت مس تو کے الیکٹرک آن اوفتا پیسہ غاتے پدی ترفنگک۔ سے شنبے آ قومی اسمبلی ٹی شیخ صلاح الدین نا کنڈآن کے الیکٹرک ئِ بجلی نا نرخ اٹی 25پیسہ اسہ یونٹ ودکی کننگ نا نیپرا نا کنڈآن موکل تننگ نا معاملہ غا توجوہ مبذول نوٹس نا ورندی ئِ ترسا پارلیمانی سیکرٹری چوہدری جعفراقبال پارے کہ بجلی نا نرخ آتیٹی سہ ماہی بنداو و فیول ایڈجسٹمنٹ نامد اٹی ردوبدل کننگ مریک۔ صارف آتا پیسہ غاتا ایڈجسٹمنٹ مریک۔ اوپارے کہ مستین دور آرتیٹی اگہ کے الیکٹرک ایڈجسٹمنٹ کتنے تو اونا جاست وپاست مننگ ئِ۔ فیصلہ بننگ آ اگہ الس نا پیسہ غاتیا حق ثابت مس تو اوفتے پیسہ تننگک۔ توجوہ مبذول نوٹس آ شیخ صلاح الدین ، مزمل قریشی، خالد مقبول صدیقی و عبدالوسیم نا سوج آتا ورندی ٹی پارلیمانی سیکرٹری چوہدری جعفراقبال پارے کہ حکومت کے الیکٹرک نا معاملہ نا تینٹ نوٹس ئِ ہلکونے و دانا ٹیرف آ نظرثانی نا بابت نیپرا ٹی زیر سماعت ئِ۔ فیصلہ ان انتظار ئِ کننگے۔ ایلو دروشم اٹی نیپرا آن بڑز ہم فورم اس ساڑی ارے۔ مست ہم کراچی نا شاری تے 2012-13ءٹی 12ارب روپئی پدی تننگانے۔