اسلام آباد ۔ 12 ستمبر (اے پی پی) وزیراعظم نا سلاہکار واپار عبدالرزاق داءود پارے کہ پاکستان افریقہ تون واپار ءِ ودفنگ کن ’’افریقہ پالیسی ‘‘آ عمل کننگ ءِ، ایتھوپیا دا بابت بھاز اہم ءُ ملک اسے ، پاکستان برنج ، ٹیکسٹائل و سل تیان بیدس انجینئرنگ نا بشخ اتون ہم برآمدات کننگ ءِ، پاکستان ٹیکٹر آتے موزمبیق ، تنزانیہ غان پد داسہ انگولا ءِ ہم برآمد کیک ۔ داخیال آتا درشانی ءِ او ایتھوپیا نا واپاری ڈل اتون اوڑدہی ٹی کرے ۔ ایتھوپیا نا ڈل اٹی اسٹیٹ منسٹر خارجہ مارکوس ٹیکلے، اسٹیٹ منسٹر واپار و صنعت مسگا نوآریگا اوار ئسر ۔ داوخت آ سیکرٹری واپار سردار احمد نواز سکھیرا ، وزارت واپار، وزارت خارجہ نا بڑزکو کمامدارآک ہم ساڑی ئسر ۔ اوڑدہی ٹی سلاہکار واپار رزاق داءود ڈل ءِ بخیر اٹ پارسا پارے کہ پاکستان افریقہ نا کنڈآن واپار ءِ ودفنگ کن ’’افریقہ پالیسی‘‘ آ عمل کننگ ءِ ۔ ایتھوپیا دا بابت بھاز اہم ءُ ملک اسے ۔ اوپارے کہ پاکستان برنج، ٹیکسٹائل و سل آن بیدس داسہ انجینئرنگ نا بشخ اتون ہم برآمدات کننگ ءِ ۔ پاکستانی ٹیکٹر آتے موزمبیق ، تنزانیہ غان پد داسہ انگولاہم برآمد کیک ۔ سلاہکار واپار رزاق داءود پارے کہ ادیس ابابا ٹی کمرشل سیکشن نا قیام کرسا افریقہ ٹی واپار ءِ مون آ دینہ ۔ اینخو نا سال نومبر اٹی پاکستان نیروبی ٹی کانفرنس اس اڈ ایتک ۔ اوپارے کہ نیروبی کانفرنس اٹی افریقی ملک آتے بٹنگنہ ۔ داوخت آ ایتھوپیا نا ڈل اٹی اوار مارکوس ٹیکلے پارے کہ پاکستان و ایتھوپیا نا واپاری تعلقداری تے پین مون آ دننگ نا گرج ءِ ۔ ڈل اٹی اوار منسٹر واپار و صنعت مسگانو آریگا پارے کہ ہڑتوم آ ملک آتانیام اٹ کاروباری بندغ آٹا نیام اٹ رابطہ غاتے ودفنگ کن ٹریڈ سیمینارز، صنعتی گڑاتا نمائش و کاروباری ڈل آٹا ہن و بر نا گرج ءِ ۔ اوپارے کہ پاکستانی زرکار ایتھوپیا ٹی ٹیکسٹائل گارمینٹ و مینو فیکچرنگ بشخ اٹی زرکاری کیر ۔
