بلوچستان  ءَ  دو سال آنی ساھت ءَ   7 لکھ 86 ہزار  زھگ آناں زانت ءُ زانشت ءِ بھر جوڑ کنگی اِنت،  سر وزیر بلوچستان

کوئٹہ۔ 05 اکتوبر (اے پی پی): بلوچستان ءِ سر وزیر میر سرفراز بگٹی ءَ جہانی استادانی روچ ءِ درگت ءَ صوبگ ءِ توامیں استاد آناں شگر ءُ منت گپت ءُ گوشت کہ چاگرد ءِ جوڑ کنگ، نوکیں نسل ءِ کردار ءِ جوڑ کنگ ءُ آیوکیں باندات ءِ جوڑ کنگ ءَ استاد بنیاتی کرد ءَ پیلو کن انت۔ بلوچستان حکومت دیم ءَ ھم استاد آنی پیشہ وارانہ شرپ ءِ رکھینگ ءُ آھاں جوانیں وانگ ءِ چاگرد ءِ پھجارینگ ءِ واستہ گامگیج چست کنت۔ بنجاھی وزیر گس ءَ چہ جاڑی بوتگیں کلوہ ءِ تہ ءَ بنجاھی وزیر میر سرفراز بگٹی ءَ گوشت کہ جوانیں وانگ ءُ زانگ ءِ واستہ استاد آناں بااختیار جوڑ کنگ ءُ آھانی پیشہ وارانہ بستار ءِ رکھینگ المی اِنت۔ اے سال ءِ جھان ءِ استادانی روچ ءِ بنگپ ءَ ھم استادانی ھمراھی ءَ اوشتگ ءُ اے پیشہ ءِ رکھینگ ءِ ھاترا ھاسیں ارزشت ءِ سر ءَ چمشانک دیگ بوتگ۔ میر سرفراز بگٹی ءَ گوشت کہ گوستگیں دو سال آنی تہ ءَ بلوچستان ءَ 786 ہزار ءَ چہ گیش زھگ وانگ ءُ زانگ ءِ نظام ءِ بھر جوڑ کنگ بوتگ انت۔ سال 2025 ءَ 231 ہزار زھگ وانگجاہ ءَ رجسٹرڈ بوتگ اَنت ءُ 2026 ءَ تاں انوگ ءَ 281 ہزار زھگ رجسٹرڈ کنگ بوتگ اَنت۔ آئی ءَ گوشت کہ بلوچستان ایجوکیشن فاؤنڈیشن ءِ کمیونٹی اسکول آنی وسیلگ ءَ 154 ہزار زھگاں وانگ ءُ زانگ ءِ موہ پجاری کنگ بوتگ اَنت وھدیکہ غیر فعالیں اسکول آناں فعال کنگ ءِ آسر ءَ پدا 95ہزار ءَ چہ گیش زھگ وانگ ءُ زانگ ءِ نظام ءِ بھر جوڑ بوتگ اَنت۔ بنجاھی وزیر ءَ گوشت کہ بلوچستان ءَ وانگ ءِ عمل ءَ را مھکم کنگ ءِ واستہ میرٹ ءِ رد ءَ 15 ہزار ءَ چہ گیش استاد بھرتی کنگ بوتگ انت۔ بلوچستان ایجوکیشن فاؤنڈیشن ءِ چیر دستی ءَ دو ہزار ءَ چہ گیش نوکیں وانگجاہ جوڑ کنگ بوتگ انت ہمے وھد ءَ دگہ ہزار ہزار اسکول ءِ جوڑ کنگ ءِ کار برجاہ انت۔ آئی ءَ گوشت کہ پی ٹی ایس ایم سی منصوبگ ھم جاری اِنت کہ ایشی ءِ تہ ءَ کمیونٹی ءِ بھر زوری ءَ اسکول آنی تہ ءَ بنیاتی آسراتی پجارینگ بہ بیت، ایشی ءِ کلیں تخمینہ ءِ ھرچ 6ارب کلدار اِنت۔ اے منصوبگ ءِ چیر دستی ءَ 2ہزار اسکول آنی سر ءَ دلگوشی دیگ بوتگ وھدے کہ کل ءَ 3640 کلاس روم جوڑ کنگ بنت۔ میر سرفراز بگٹی ءِ رد ءَ یک اتاقی اسکول آنی تہ ءَ گیشیں کلاس روم جوڑ کنگ ءِ منصوبگ ھم جاری اِنت، وھدیکہ اسکول آنی تہ ءَ بنیاتی آسراتی پجاری ءِ ھواری ءَ وانگ ءُ زانگ ءِ شرپ ءِ گہتری ءِ سر ءَ ھم دلگوشی دیگ بوھگ ءَ اِنت۔ بنجاھی وزیر بلوچستان ءَ گوشت کہ استاد نہ ایوک ءَ زانت ءِ دیم دیوک اِنت بلکینگ ءَ زھگ آنی شخصیت، کردار ءُ سوچ ءِ جوڑ کنگ ءَ ھم بنیاتی کرد پیلو کنت۔ شعوری، وانندہ ءُ ذمہ واریں چاگرد ءِ جوڑ کنگ ءَ استادانی ھزمت مدام یات کنگ بنت۔ آئی ءَ گوشت کہ حکومت استاد آناں جوانیں درس ءِ چاگرد ءُ پیشہ وارانہ دیمروئی ءِ موہ پجاری ءِ واستہ گامگیج برجاہ دار ایت۔ زھگانی وشیں باندات ءِ واستہ وانگ ءُ زانگ ءُ استادانی تہ ءَ سرمایہ کاری اسل ءَ بلوچستان ءِ باندات ءِ سر ءَ سرمایہ کاری اِنت ۔ بنجاھی وزیر ءَ گوشت کہ بلوچستان حکومت ءِ مول ءُ مراد یک انچیں وانگ ءُ زانگ ءِ نظام جوڑ کنگ انت کہ اودا ھمک زھگ ءَ را وانگ ءُ زانگ ءِ ھک بہ بیت ءُ ھمک وانگجاہ کارآمد بہ بیت۔ ہر استاد ءَ را وتی ذمہ واری آنی جوانیں رنگ ءَ پیلو کنگ ءِ ھاترا المی ئیں آسراتی ءُ سازگاریں چاگرد ءِ وسیلگ ءَ دیم ءَ آرگ بیت۔