مزن وزیر ءَ پولینڈ ءِ وزیر ءُ ھاسیں ازمت آنی کوآرڈینیٹر ءَ گوں گند ءُ نند کت، پاکستان خطہ ءَ امن ءُ ایمنی ءِ دیمروئی ءِ واستہ جزمیگ انت، شہباز شریف

لاہور۔5اکتوبر  (اے پی پی):  مزن وزیر محمد شہباز شریف ءَ دمگی کشاں چیل آنی ھلاسی ءُ جیڈھ آناں گیواری ءِ واستہ گپ ءُ تران ءُ سفارتکاری ءِ ارزشت ءِ سر ءَ زور پر دیان ءَ گوشت کہ پاکستان دمگ ءَ امن ءُ ایمنی ءِ دیمروئی ءِ واستہ جزمیگ اِنت۔ دو شمبے ءِ روچ ءَ مزن وزیر ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر محمد شہباز شریف ءَ گوں پولینڈ ءِ وزیرانی کونسل ءِ وزیر ءُ ھاسیں ازمت آنی کوآرڈینیٹر توماس زیمونیک ءَ گند ءُ نند کتگ۔ مزن وزیر ءَ پاکستان ءُ پولینڈ ءِ سیادی آنی تہ ءَ جوانیں دیمروئی آنی سر ءَ دل یکیمی ءِ درشان کنان ءَ گوشت کہ پاکستان اے راجدپتری دوستی ءَ را دراج مدتی، مھکم ءُ کثیر جہتی شریکداری ءِ تہ ءَ بدل کنگ ءِ واھشت مند اِنت۔ مزن وزیر ءَ دوئیں ملک آنی نیام ءَ انوگیں سیادی آنی سر ءَ چار ءُ تپاسی کنان ءَ دو نیمگی سیادی آناں دیمروئی دیگ ءِ واستہ مزن تک ءِ سروکی ءِ تبادلہ ءِ ارزشت ءِ سر ءَ زور پر دات۔ مزن وزیر ءَ دوئیں ملک آنی کاروباری برات آنی نیام ءَ سیادی ءَ را گیش دیمروئی دیگ ءِ لوٹ کت۔ مزن وزیر ءَ یورپی یونین ءِ جی ایس پی پلس اسکیم ءِ ھوالگ ءَ پاکستان ءِ کمک ءِ پد ءَ پولینڈ ءِ شگر ءُ منت گپت ءُ دل یکیمی ءِ درشان کت کہ دوئیں ملک توامیں پڑ ءَ وتی سیادی ءَ را گیش مھکم کن اَنت۔ گند ءُ نند ءِ ساھت ءَ دوئیں نیمگ ءَ ھاسیں رنگ ءَ میاں اوستمانی تک ءِ جاور ھال آنی سر ءَ ھم گپ ءُ تران کنگ بوت۔ مزن وزیر ءَ دمگی کشی آناں ھلاس کنگ ءُ جیڈھ آنی گیواری ءِ واستہ گپ ءُ تران ءُ سفارتکاری ءِ ارزشت ءِ سر ءَ زور پر دات ءُ دمگ ءَ امن ءُ ایمنی ءِ دیمروئی ءِ واستہ پاکستان ءِ جزم ءِ سر ءَ پدا زور پر دات۔