استاد راج ءِ گواچنی جوڑیشتکار انت، نوکیں نسل ءَ را نوکیں وانگ ءُ زانگ ءُ پٹ ءُ پول ءَ گوں لیس کنگ راجی دیمروئی ءِ ھاترا المی انت، وفاقی وزیر منصوبہ بندی

لاہور۔5اکتوبر  (اے پی پی): وفاقی وزیر برائے منصوبہ بندی ءُ دیمروئی احسن اقبال ءَ گشتگ کہ استاد راج ءِ جوڑیشتکار انت، نوکیں نسل ءَ را نوکیں وانگ ءُ زانگ ءُ پٹ ءُ پول ءَ چہ لیس کنگ المی انت۔ آئی ءَ اے ھیالانی درشانی نارووال پبلک اسکول ءَ استاد آنی روچ ءِ مراگش ءُ روبوٹکس لیبارٹری ءِ بنگیج ءِ مراگش ءَ گوں تران کنان ءَ کت۔ وفاقی وزیر ءَ گوشت کہ استاد راج ءِ گواچنی جوڑیشتکار ءُ راج ءِ روحانی خیر خواہ انت۔ مرچیگیں زانت ءُ سرپدی ءِ دور ءَ استاد ءِ کرد ایوک ءَ وانینگ ءَ گوں بندوک نہ اِنت بلکیں آ انچیں کردار ءُ شعوری شہری پیداک کن اَنت کہ راجانی مقدر ءَ بدل کن اَنت۔ وفاقی وزیر ءَ استاد آناں شگر ءُ منت درشان کنان ءَ گوشت کہ جوانیں ڈاکٹر، سوبمندیں وکیل ءُ جوانیں پٹ ءُ پولکار ءِ سوبمندی ءِ پُشت ءَ استاد ءِ مستریں کرد اِنت۔ استاد ایوک ءَ کارے نہ کنت بلکیں ماموریت ءِ پیلو کنت۔ آئی ءِ کرد ءُ وانینگ چاگرد ءِ راہ ءُ راہبند ءَ ٹہین ایت۔ آئی ءَ گوشت کہ مرچیگیں زمانگ ءَ علم ءُ زانت ءِ رفتار سک تیز بوتگ ءُ آرٹیفیشل انٹیلی جنس دگنیا ءَ بدل کنگ ءَ انت پمیشکا استاد آناں ھم وتی وانگ ءِ تہ ءَ گیشی کنگی انت۔ علم انگت کتابانی تہا بندوک نہ انت بلے دنیا ءِ یونیورسٹیانی ریسرچ ءُ اکیڈمک مواد انٹرنیٹ ءِ وسیلہ ءَ چہ لوگ ءَ چہ دست کپیت۔ احسن اقبال ءَ استاداں چہ لوٹ کت کہ آ زھگانی تہ ءَ نبشتہ کاری ءِ ھُنر ءَ را گیش بہ کن اَنت ءُ آھاں ایوک ءَ کتاب وانگ ءِ بدل ءَ کتاب نبشتہ کنگ، پٹ ءُ پول کنگ ءُ جیڑھانی گیواری ءِ ھاترا توانمند بہ کن اَنت۔ استاد وت پہ زھگاں یک عملی درورے بہ بیت ءُ یک انچیں وانگ ءُ زانگ ءِ چاگردے جوڑ بہ کنت کہ اودا نودربر گوں جوش ءُ جزبگ ءَ نوکیں زانت ءُ سرپدی ءَ بہ زور اَنت۔ احسن اقبال ءَ گوشت کہ مصنوعی ذہانت ءُ کمپیوٹر سائنس ءِ پڑ ءَ تیزی ءَ گوں دیمروئی بوھگ ءَ اِنت، ورنا آناں اے پڑ آنی تہ ءَ مہارت ءِ دربرگ لوٹ ایت، زانت مدام بدل بوھگ ءَ اِنت ءُ نوکیں نوکیں چیز دیم ءَ آیگ ءَ اَنت، پمیشکا نوکیں زانت ءِ بابت ءَ مدام سرپدی المی اِنت، اگاں نہ کوھنیں زانت ھم کارآمد نہ بیت۔ آئی ءَ گوشت کہ یک زمانگے بوتگ کہ مسلمان زانت ءُ سائنس ءِ پڑ ءَ دگنیا ءِ دیم ءَ روگ ءَ اتنت ءُ خلائی شوبگ ءَ ھم دیم ءَ اتنت بلے وھدے کہ زانت ءِ گوما سیادی نزور بوت، سروکی مغرب ءِ نیمگ ءَ شِفٹ بوت گڑا مارا پدا زانت، پٹ ءُ پول ءُ نوآبادیاتی ءِ گوما وتی سیادی ءَ را مھکم کنگی انت۔ احسن اقبال ءَ گوشت کہ پاکستان ءِ دیمروئی ءِ واستہ ورنائیں نسل ءَ را نوکیں وانگ ءُ زانگ، سائنس، ٹیکنالوجی، مصنوعی ذہانت ءُ ریسرچ ءَ چہ لیس کنگ المی انت، حکومت اے رد ءَ توامیں وسیلگ آناں کارمرد کنگ ءَ انت۔ وفاقی وزیر ءَ گوشت کہ سوبمندیں چاگرد ھما چاگرد اِنت کہ آ ھمگرنچی ءِ تہ ءَ اختلاف رائے ءَ را دیم ءَ برگ ءَ اِنت، تعصب ءُ نفرت یک مردم ءِ شعور ءُ ذہنی صلاحیت ءَ را متاثر کنت، پمیشکا آیوکیں نسل ءَ را نفرت ءُ تعصب ءِ بُن ءَ چہ پاک دارگ مئے راجی فرض اِنت۔ وفاقی وزیر ءَ گوشت کہ ورنا آناں سوشل میڈیا ءِ جوانیں کارمردی، پٹ ءُ پول ءُ تصدیق بوتگیں زانتکاری آنی نیمگ ءَ دلگوش کنگ لوٹ ایت ءُ امن، دیمروئی ءُ برجائی ءِ بنیاد ءَ چاگرد ءَ را دیم ءَ برگ لوٹ ایت۔ وفاقی وزیر ءَ گوشت کہ وانگ ءُ زانگ ءِ مول ءُ مراد ایوک ءَ ڈگری ءِ گرگ نہ اِنت بلکینگ ءَ باصلاحیتیں شہری پیداک کنگ اِنت کہ آ وتی دمگ ءُ ملک ءِ جیڈھ آناں سرپد بہ بنت ءُ آھانی گیواری ءَ بہ کن اَنت۔