اسلام آباد ۔ 12 ستمبر (اے پی پی) ترجمان دفترخارجہ ڈاکٹر محمد فیصل پارینے کہ وزیراعظم عمران خان (اینو) جمعہ نادے مقبوضہ کشمیر اٹی حالیت آتا بابت پالیسی بیان ایتک ۔ پالیسی بیان کشمیر نا ویل اکن پاکستان نا پدریسہ کوشست آتا بشخ ءِ ۔ پاکستان و بھارت نا نیام اٹ ہچ ءُ اودیم مذاکرات اس مفننگ ءِ، بھارت مذاکرات نا میز آ بننگ آن خارزدہ ءِ ۔ پنچ شنبے نادے آ ہفتہ وار بریفنگ اٹی ترجمان پارے کہ داکان بیدس مقبوضہ جموں و کشمیر نا بابت ایلو چندی گام گیج آتیا سجفنگ انگ ءِ ۔ اوپارے کہ دا اسہ واقعہ اس اف بلکن کشمیر کن جہد پدریسہ عمل ءِ، کشمیر نا بابت ننا موقف پیدوار ءِ ۔ پاکستان داہیت آ باور کیک کہ کشمیر تون اوار بھارت تون غٹ جھیڑہ غاتے مذاکرات نا کمک اٹ ایسر کننگ مریک ۔ ہیومن راءٹس کونسل اٹی 58 ملک آتا پاکستان نا مخ تفی نا بابت اسہ سوج اسے نا ورندی ءِ ترسا ترجمان پارے کہ دا ملک آتے ٹی زیات تر او آئی سی نا باسک و ایلو ملک آک اوارءُ، ہرافک بھارت نا غیر کانودی کوزہ و وادی ٹی مواصلات نا پورو لاک ڈاءون نا مذمت ءِ کریر ۔ ترجمان اسہ سوج اسے نا ورندی ءِ ترسا سعودی و یو اے ای وزیر خارجہ غاتا بابت کشمیر نا ویل ءِ مسلم امہ تون گنڈنگ پننگ نا بابت میڈیا رپورٹ ءِ ’’قیاس آرائی ‘‘گوندا و پارے کہ دانا برعکس ہڑتوم آ وزیر خارجہ غاتا دورہ سعودی عرب و یواے ای نا کنڈآن پاکستان تون یکجہتی نا درشانی و کشمیر نا ویل انا مخ تفی ءِ پک کرے ۔ تنازعہ کشمیر نا بابت پاکستان و بھارت نا نیام اٹ امریکی صدر نا ثالثی نا پیش کش نا بابت ترجمان پارے کہ امریکہ غان بیدس ایلو ملک آک ہم ثالثی نا پیش کش کرینو ولے بھارت مذاکرات نا میز آ بننگ آن خاءف ءِ ۔ اوپارے کہ بھارت نا منفی ردعمل کشمیر نا ویل انا ایسری ٹی ہرے نا سوب ءِ ، ہرامقبوضہ کشمیر اٹی انسانی تنکی نا حالیت ودی کرینے ۔ ترجمان بھارت آ زور شاغا کہ او جہانی میڈیا و انسانی حق انا تنظیم تے مقبوضہ کشمیر آ ہننگ نا موکل ایتے ۔ امریکہ و طالبان تا نیام اٹ مذاکرات نا بابت اسہ سوج اسے نا ورندی ءِ ترسا ترجمان پارے کہ پاکستان داسہ ہم داہیت آ باور کیک کہ اوغان تنازعہ ءِ فوجی ایسری ممکن اف ۔ پاکستان اوغان امن عمل نا است بڈی و مخ تفی ءِ برجاتخک ۔ اوپارے کہ اوغانستان نا تنازعہ اوغان حکومت و الس نا سرکڑدہ ہی ٹی پرامن مذاکرات نا کمک اٹ ہی ایسر کننگ مریک ۔ ترجمان اومیت ظاہر کرے کہ امریکہ و طالبان تا نیام اٹ امن مذاکرات زوت بحال و ڈیہہ ٹی امن نا گچین فائدہ ٹی اونا مثبت بھرم دوئی مریک ۔ کرتارپور نا مذہبی سیل و سواتی تیان 20 ڈالر فیس انا بابت ترجمان وضاحت کرسا پارے کہ دا انٹری فیس اف بلکن سروس فیس ءِ ۔ دا رقم روڈ، بس، خیر مقدمی سنٹر آتون اوار تعمیرات و سیل و سواتی تیکن آسراتی آ خڑچ کننگک ۔ بھارتی جاسوس کلبھوشن یاوید تون بھارتی سفارتکار آتا ارٹ میکو اوڑدہی نا بابت ترجمان پارے کہ ہچ ءُ ارٹ میکو اوڑدہی اس مفننگ ءِ ۔ ترجمان اسرائیلی وزیراعظم بنجمن نتن یاہو نا کنڈآن وادی اردن نا بابت بیان ءِ مسترد کرسا پارے کہ پاکستان ہر غیر کانودی گام گیج ءِ مسترد کیک، دا گام گیج ڈیہہ ٹی بے چیٹی تیٹی ودکی نا سوب مننگ کیک ۔
