اسلام آباد ۔ 05 ستمبر (اے پی پی) عراق نا دارالحکومت بغداد اٹی مروک آ ایشیائی پارلیمانی اسمبلی نا قائمہ کمیٹی بجٹ و ڈٹ بندی نا دیوان اٹی بیرسٹر محمد علی سیف نا کشمیر نا بابت تران اٹی بھارتی مندوبین ءِ شدید خفت اتون مون تروک مس و وار وار اونا تران اٹی اڑاند شاغنگ نا کوشست کرے ولے بیرسٹر سیف پارے کہ ایشیائی ملک آتا پارلیمان آتے دا چرجوئی ٹی اسہ اسیجائی لاءحہ عمل اس اختیار کروئی مریک انتئے کہ دہشت گردی ، انتہاپسندی و اقتصادی و معاشی ویل آک ننا غٹ انا اسیجاءُ و داویل آتے شکست تننگ کن ننے یکجا مروئی تمک ۔ اوپارے کہ کشمیری تیا کروک آ بیدادی و بھارتی فوج انا کنڈآن مقبوضہ دامان اٹی انسانی حق انا خلاف ورزی تا چرجوئی برجاءِ، و جہانی برادری خاص وڑ اٹ ایشیائی سرکڑدہ غاتے دا ہیت انا سختی اٹ نوٹس ءِ ہلوئی مریک ۔ اوپارے کہ اینو ایشیائی ڈیہہ ویل آتیان دوچار ءِ و ننے دا ویل آتا ایسری ءِ تینٹ ہی پٹوئی تمک ۔ بیرسٹر سیف پارے کہ پاکستان ایشیا نا شونداری ءِ خواہک واو ایشیائی پارلیمانی اسمبلی نا فوم آ ہمیشہ آن مثبت کڑد ادا کرینے و نن ڈیہہ ٹی امن ءِ مون آ دننگ نا کوشست آتا مخ تفی ءِ کینہ ولے پاکستان کشمیری الس تون سلوک ءِ و ایشیائی سرکڑدہ غاتے ہم دا ہیت انا احساس ءِ کروئی مریک کہ مظلوم کشمیری تے کن توار بڑز اکے ۔ بیرسٹر محمد علی سیف پاکستان نا موقف ءِ پبی وڑاٹ پیش کرے ہرانا بشخ ہلوک آک ہم ستاءِ کریر ۔ ایشیائی پارلیمانی اسمبلی نا دا اہم کمیٹی نا دیوان بغداد اٹی 3آن 5 ستمبر اسکان اڈ ہلنگ ءِ ہراٹی بجٹ و ڈٹ بندی نا بابت معاملہ و ایلو اہم معاملہ غاتیا سجفنگک ۔ پاکستانی ڈل انا کماشی ءِ سینیٹر بیرسٹر محمدعلی سیف کننگ ءِ وخت اس کہ ڈل اٹی سینیٹر سجاد حسین طوری و ثناء جمالی ئسک ہم اوارءُ ۔
