اسلام آباد۔ 3 ستمبر (اے پی پی) مزن وزیر عمران خان ءِ ھاسیں پنت ءُُ شون ءِ پد ءَ وزارت ءِ درئی کار ءَ جوڑ کتگیں “کشمیر سیل” ءِ اولی دیوان سئے شمبے ءَ وزیر ءِ درئی کاری شاہ محمود قریشی ءِ سروکی ءَ برجم دارگ بوت۔ دیوان ءَ بنجاھی وزیر کانود فروغ نسیم، سول ءُُ اُردی کارندہ، سیکرٹری درئی کار ءَ ھوار وزارت ءِ درئی کار ءِ کلانہ ایں کارندہ ھم اے موہ ءِ سر ءَ ساڑی اتنت۔ دیوان ءَ مقبوضہ جموں کشمیر ءَ ایمنی ءِ ھرابیں جاور ھال ءُُ پاکستان ءِ انوگ ءَ تاں بوتگیں سفارتی کوشست ءُُ کشمیر کونسل ءِ دیوان ءَ دیم ءَ آیوکیں شور ءُُ مشور، چیئرمین سینیٹ کمیٹی برائے درئی کار ءُُ شرپ مندیں پارلیمنٹ ءِ ممبر آنی نیمگ ءَ چہ رستیں شور ءُُ سلاھ آنی سر ءَ چار ءُُ بچار کنگ بوت۔ دیوان ءِ ساھت ءَ مقبوضہ جموں کشمیر ءَ جاڑیگیں بنی آدم آنی لگت مالی ءَ را سرجمیں دگنیا ءَ جتا جتائیں فورمز آنی سر ءَ سہرا کنگ ءِ واستہ جتا جتائیں بھر آنی سر ءَ شور ءُُ مشور کنگ بوت۔ شاہ محمود قریشی ءَ اے موہ ءِ سر ءَ گوشت کہ مقبوضہ جموں کشمیر ءِ ھوالگ ءَ ہندوستان ءِ گپ ءُُ گال یک شل ءَ مٹ بوھان اَنت وھدیکہ پاکستان ءِ لیکہ ھما یکیں جاھ ءَ اوشتاتگ۔ آئی ءَ گوشت کہ پاکستان مقبوضہ کشمیر ءِ بے کسوریں مسلمان آناں بھارتی ظلم ءُُ زوراکی ءَ چہ آزات کنگ ءُُ آوانی وت واجئی ءِ در جنگ ءِ کوشست ءَ آوانی سیاسی، سفارتی ءُُ اخلاقی کمک ءَ جاڑی دار ایت۔ اے ھاسیں سیل ءِ جوڑیشت ءِ مول ءُُ مراد مقبوضہ کشمیر ءِ ھوالگ ءَ تاجگیں جاور ھال آنی سر ءَ چار ءُُ بچار کنگ ءُُ ملکی ءُُ درئی پالیشی آناں ترجی آنی رد ءَ جموں کشمیر ءِ ھوالگ ءَ جوانیں گامگیج شاھیگان کنگ ءِ ھوالگ ءَ ضلوری کمک پجارینگ انت۔
