کوئٹہ۔ 06فروری (اے پی پی) کوئٹہ میٹرو پولیٹن کارپوریشن نا ڈپٹی میئر محمدیونس بلوچ سرسہب ورکرز کنونشن نا اڈتننگ آ وزیراعلیٰ و صوبائی صدر پاکستان مسلم لیگ (ن) نواب ثناءاللہ خان زہری ، جنرل سیکرٹری نصیب اللہ خان بازئی و مسلم لیگ (ن) ضلع کوئٹہ نا عہدیدار و کارندہ غاتے مبارکباد پیش کرسا پارے کہ پر و برف باری نا باوجود تینا سرکڑدہ غاتا کال آ لبیک پارسا بھلو کچ اسے ٹی نرینہ و نیاڑیک ورکرز کنونشن اٹی بشخ ہلسا ثابت کریر کہ پاکستان مسلم لیگ (ن) بلوچستان اٹی مست آن زیات متحد و منظم ئِ و چیف آف جھالاوان صوبائی صدر مسلم لیگ (ن) نواب ثناءاللہ خان زہری نا سروکی و کارندہ غاتا خواری نا سوب بلوچستان اٹی بروک آ حکومت ہم مسلم لیگ (ن) نا مریک، اوپارے کہ کارندہ غاک ہر پارٹی ٹی مخ انا ملی نا حیثیت تخرہ ہنداخاطران کارندہ و پارٹی راہشون آتا تین پہ تینی صلابت آن وزیراعلیٰ بلوچستان 8 کوآرڈنیٹر مقرر کرینے تانکہ پارٹی کارندہ غاتا ویل آک اوفتا درگہ غا ایسر مریر ، ڈپٹی میئر محمد یونس بلوچ پارے کہ وزیراعلیٰ بلوچستان نواب ثناءاللہ خان زہری الس نا شونداری و شونہالی نا سفر ئِ مون آ درسا صوبہ نامر مر انگا علاقہ غاتے کن ایمبولینس سروس نا فراوانی و طالب علم آتے لیپ ٹاپ نا فراوانی نا پڑو کرسا شاری تے است ئِ کٹانے۔ اوپارے کہ صوبائی دارالحکومت کوئٹہ ٹی جان جوڑی و صفائی نا حالیت آتے گچین جوڑ کننگ و تجاوزات آتے چٹفنگ حکومت نا اولین اولیت ئِ ہراڑکن وزیراعلیٰ بلوچستان بھلو زر اس تسنے و پوریا گر برادری و کوئٹہ نا شاری تا کمکاری نا سوب کوئٹہ ئِ اسہ وار ولدا ماضی آنبار لٹل پیرس جوڑ کینہ۔
