اسلام آباد۔ 06فروری (اے پی پی) وزیراعظم محمد نواز شریف پاکستان و بحرین نا نیام اٹ وسعت پذیر ہڑتوم آ کنڈآتا واپار نا اہمیت ئِ تالان کرسا پارینے کہ پاکستان بحرین تون تینا تعلقداری تے بھاز اہمیت ایتک۔ اوداہیت ئِ دوشنبے آ بحرین نا وزیر خارجہ شیخ خالد بن احمد الخلیفہ تون وزیراعظم ہاﺅس اٹی ہیت وگپ کرسا پارے ہرا شاہی خاہوت نا باسک آتون اوار بڑزکو کہول انا حکومتی ڈل اتون پاکستان نا دورہ غاٹی ئِ۔ بحرین نا وزیر خارجہ شاہ حمد بن عیسیٰ الخلیفہ نا کنڈآن وزیراعظم کن نیک است خواہی نا خصوصی کلہو ئِ ہم سرکرے۔ اووزیراعظم ئِ پارے کہ پاک بحرین فروغ پذیر تعلقداری نا بناءآ دا رابطہ غاتے اسیجائی وزارتی کمیشن نا دروشم اٹی اپ گریڈ کننگانے و اسیجائی کمیشن نا اولیکو دیوان اسلام آباد اٹی مننگ ئِ۔ ہراٹی ہڑتوم آ ملک آک سفارتی ، اقتصادی ، واپاری، اسٹریٹجک و سفارتی تعلقداری تے ودفنگ کن جامع خیال آتا درشانی ئِ کیرہ۔ وزیراعظم اسیجائی وزارتی کمیشن نا اڈتننگ نا اہم گام انا خیرمقدم ئِ کرسا پارے کہ دا داہیت انا غماز ئِ کہ پاکستان بحرین تون تینا تعلقداری تے بھاز قدر ایتک۔ وزیراعظم پاکستان نا سفیر جاوید ملک نا کارکڑد انا ستائِ کرسا داپت انا درشانی ئِ کرے کہ ہڑتوم آ ملک آتا نیام اٹ تعلقداریک ودسا کارہ۔
