اسلام آباد۔ 03فروری (اے پی پی) وزیراعظم محمد نواز شریف کراچی۔حیدرآباد ایم نائن نا پورومروک بشخ انا بناءکن جمعہ آ کراچی آ سرمس تو بالی پٹ آ سندھ انا گورنر محمد زبیر ، وزیراعلیٰ سید مراد علی شاہ اودے بخیر کریر۔ داوخت آ سینیٹر مشاہد اللہ خان و مسلم لیگ (ن) نا اہم راہشون و بڑزکو کمامدارآک ہم ساڑی ئسر۔ وزیراعظم محمد نواز شریف کراچی حیدرآباد موٹروے ایم نائن نا پورو کروک آ 75کلو میٹر مریس و 6رویہ بشخ انا بنائِ کیک۔ 136کلو میٹر مریس ایم نائن نا سیکشن نا 4انٹرچینج ئُ۔ ہرافتے ٹی دادا بھائی ، انڈسٹریل ویلی، نوری آبادی و تھانوبولاخان انٹرچینج اوار ئُ۔ دا انٹر چینج آتیان کیر تھر نیشنل پارک، کھینجر جھیل و تھانواحمد خان تون اوار کیہی علاقہ غاتسکان رسینگ دوئی مریک۔ نوری آباد و دمبہ گوٹھ آ 5پول و 2ٹراما سینٹر ہم جوڑ جاڑ کننگانے۔ 136کلو میٹر مریس کراچی حیدرآباد موٹروے ڈٹ 17ستمبر 2015ءآ بناءکننگا ہرانا پوروی بروک آ سال مارچ اٹی گمانی ئِ و داڑآ 36ارب روپئی خڑچ بریک۔ حکومت ہائی وے و موٹروے نا کیہی ڈٹ آتیا 1200 ارب روپئی خڑچ کننگ ئِ ہراڑآن ملک انا اقتصادی منظر نامہ بدل مریک۔ جوڑجاڑ مروک موٹروے تیٹی تھاکوٹ حویلیاں ، لاہور عبدالحکیم ایم تھری، سکھر ملتان ایم فائیو، گوجرہ شورکوٹ و شورکوٹ خانیوال اوار ئُ۔ دا ڈٹ آتا پوروی آن ملک اٹی موٹروے تا جم اٹنگا طوالت 2ہزار کلو میٹر اسکان رسینگک۔
