18نومبر 2015ءآن پد وزیرداخلہ نا حکم آ انسانی اسمگلنگ اٹی اوار بندغ آتا برخلاف ملک گیر کارروائی ٹی 3ہزار 9 بندغ دزگیر کننگا
اسلام آباد۔ 03 فروری (اے پی پی) پارلیمانی سیکرٹری داخلہ محمد خان ڈھانڈلہ پارینے کہ 18 نومبر 2015ءآن پد وزیر داخلہ نا حکم آ انسانی سمگلنگ اٹی اوار بندغ آتا برخلاف ملک گیر کارروائی ٹی 3ہزار 9 بندغ دزگیر کننگا۔ جمعہ آ قومی اسمبلی ٹی وقفہ سوج آتیٹی نفیسہ عنایت اللہ خان خٹک نا سوج انا ورندی ٹی پارلیمانی سیکرٹری پارے کہ ایف آئی اے نا ریڈبک اٹی انسانی سمگلنگ اٹی اوار 69بے کچ درکار بندغ ئُ، 18نومبر 2015ءآن پد وزیر داخلہ نا حکم آ انسان تا اسمگلنگ اٹی اوار بندغ آتا برخلاف ملک گیر کارروائی ٹی داوخت اسکان 3ہزار 9 بندغ دزگیر مس۔ انسانی اسمگلر آتا برخلاف گام گیج نا رداٹ اوفتا قومی شناختی کارڈ و پاسپورٹ آتے بلاک کننگانے و اوفتا پن ئِ ای سی ایل اٹی شاغنگانے وخت اس کہ عارضی وڑاٹ اوفتا بینک اکاﺅنٹ آتے ہم بند کننگانے۔ ثریا جتوئی نا سوج انا ورندی ٹی پارلیمانی سیکرٹری پارے کہ ضبط یا ہلوک آ منشیات ئِ زیان کننگک۔ آسیہ ناز تنولی نا سوج انا ورندی ٹی پارلیمانی سیکرٹری داخلہ پارے کہ تربیتی کورس آک اسلام آباد پولیس نا سینئر افسر آتا براہ راست چاری گری نا رداٹ کرفنگرہ۔ داکان بیدس افسر آتے چین، امریکہ، تھائی لینڈ ، آسٹریلیا ، برطانیہ ، فرانس ، اٹلی و سپین اٹی ہم اوفتے تربیت کن گدریفنگک۔
