کابل ۔ 19 اگست (اے پی پی) اوغان دارالحکومت کابل اٹی ہفتہ نادے آ خودکش جلہو و بمب دھماکہ غاتا نشانہ مروک آ برام نا دود اٹی بادشاہ و برامی ہڑتوم آک بچانو ۔ برطانوی خبر رساں ادارہ نا رداٹ اوغان ٹی وی چینل ءِ انٹرویو ٹی بادشاہ میر واعظ علمی پارے کہ واقعہ ٹی کہوک آ 63بندغ اٹی اونا اسہ ایلم اس و کیہی سیال آک اوارو وخت اس کہ برامی نا باوہ پارے کہ اونا خاہوت نا 14بندغ خلنگانو ۔ بادشاہ میر واعظ علمی مستی پارے کہ او اگہ زندہ بچانے ولے تینا ایلم و کیہی سیال آتا کہینگ نا سوب آن او بھاز مایوسی نا حالیت اٹی ءِ و اونا خیال ءِ کہ اونا ملک اٹی دُن انگا واقعہ غاک بند مننگ نا ہچ ءُ گمان اس اف و او تینا بروک آ زند اٹی ہچ ءُ خوشی اس خنپک ۔ اوپارے کہ اونا اُرائی داواقعہ غان پد بھاز صدمہ ٹی ءِ و او وار وار آ تسینگک ۔ میر واعظ علمی پارے کہ او دود اٹی بروک آ مہمان تے بخیر کریکہ و ہر چہرہ غا خوشی اس تالان ئس کہ دھماکہ مس و ہرافتا مون آ منہ منٹ مست خوشی اس تالان ئسک ، ہال اٹی اوفتا لاش آک تموک ئسر ۔
