اسلام آباد۔ 01فروری (اے پی پی) وزیراعظم محمد نواز شریف پارینے کہ پاکستان نا تزویراتی محل و وقوع اودے ایشیا نا اولین واپاری ، توانائی و ٹرانسپورٹ راہداری جوڑ مننگ کن بھلو وارخواہی اسے نا حامل مارکیٹ اس جوڑ کیک۔ اوداہیت ئِ ہالینڈ نا کمپنی رائل فرائز لینڈ کیمپینا نا چیف ایگزیکٹو آفیسر رئیولوف اے جوسٹن تون چارشنبے آ داڑے ایوان وزیراعظم اٹی ہیت وگپ کرسا پارے۔وزیراعظم پارے کہ ملک انا جم اٹنگا آبادی 60درسد ورناتیا تالان ئِ و داڑے غیر ہنر مند آن ہلیس بے کچ مہارت یافتہ پروفیشنل آتیامبنی باصلاحیت افرادی واک خننگک۔ وزیراعظم ڈل ئِ پارے کہ حکومت کشارگر آتے آسراتی تننگ کن کھد آ سبسڈی ٹی ساڑی ہی ٹی ودیکی کرینے و مسابقت نا جہانی چیلنج آتا مقابلہ و براہ راست درملکی زرکاری راغب کننگ کن خصوصی اقتصادی زون تے کن کانود اس وضع کرینے۔ اوپارے کہ ساڑی حکومت کیہی بشخ آتیٹی واپار و زرکاری ٹی آسراتی تننگ کن بنداوی ڈھانچہ ، توانائی و مواصلاتی ڈٹ آتیا سرگرمی اٹ کاریم کننگ ئِ۔ وزیراعظم محمد نواز شریف پارے کہ نن خوش قسمت اُن کہ ننا داڑے چار موسم، بھلا ڈغار، قدرتی وسیلہ غاتا فراوانی ، مربوط آبپاشی نظام، سازگار چاگڑد ، مچ آ سال فصل آتا پیداوار، تربیت یافتہ افرادی واک وفعال اقتصادی حالیت خننگک۔ وزیراعظم داہیت آ زورشاغا کہ ساڑی حکومت زرکار آتا پت اٹی ودکی کن اقتصادی اصلاحات آ چکار کرینے وخت اس کہ اقتصادی ٹک آک مثبت و سوگو ئُ، ہرافتے امنا جہانی اداررہ غاک ہم کننگ ئُ۔ رئیو لوف اے جوسٹن پارے کہ نن پاکستان اٹی ہنداخاطران زرکاری کرین انتئے کہ نیامی ایشیاننا کاروباری حکمت عملی کن بھاز اہم ئِ و پاکستان ڈیہہ ٹی زرکاری کن ننے موقع فراوان کرے۔ اوڈیری مصنوعات آتا بشخ آتا ذکر ئِ کرسا پارے کہ پاکستان اٹی زرکاری ناداہم سوب ئِ کہ نن ملوک آ پال آن ہلیس پیک ملک اسکان بھاز بھلو بدلی اس خننہ۔ ملک اٹی متوسط تپہ نا کٹیا ٹی ودکی خننگ اٹی بسنے ہراترندی اٹ ودنگ ئِ وخت اس کہ ملک اٹی اربنائزیشن ئِ ہم مون آ دننگ رسینگ انگ ئِ، نن محسوس کینہ کہ ملک اٹی ودوک آ طلب ئِ پورو کننگ کن ڈیری مصنوعات آتا بڑزکو معیار درکار ئِ ہندا سوب ئِ کہ نن تینا ٹیکنالوجی و مہارت ئِ اتنگ اُن و نن پاکستان نا کشارگر برادری تون اوار اٹ پاکستانی مارکیٹ کن دا مصنوعات آتا مون آ دننگ کن تینا آزموندہ ئِ کاریم اٹ اتنگ اُن۔ اوپارے کہ او بروک آ منہ سال اٹی پاکستان اٹی 10 کروڑ ڈالر نا ودکی زرکاری اتنگ نا ہم ڈٹ بندی کننگ ئُ۔ اوڑدہی ٹی وزیر خزانہ اسحاق ڈار ہم ساڑی ئس وخت اس کہ ڈل اینگروکارپوریشن نا صدر و سی ای او حسین داﺅد، غیاث خان، سی او او پائٹ ہلاردس، سی ایف او ہائن شوما چر و کمپنی ڈائریکٹر ہینڈس لاراکر آ تالان ئس۔
