اسلام آباد۔ 05مئی (اے پی پی) سلاہکار خارجہ سرتاج عزیز پارینے کہ پاکستان امریکہ آ سَفا کرینے کہ او ڈیہہ ٹی طاقت نا توازن ئِ برقرار تخے۔ پاکستان ہشت ایف سولہ جہاز آتا ہلنگ کن فنڈ انا فراوانی نا معاملہ غا امریکہ تون پدریسہ رابطہ ٹی ئِ۔ واہم نن تون ایلو آپشن آک ہم ساڑی اریر۔ پاکستان ایف سولہ جہاز آتا ہلنگ کن 70کروڑ ڈالر نا بل ئِ تینٹ ادا کیک۔ بنائی وڑاٹ پاکستان ئِ 8ایف 16جہاز آتا ہلنگ کن تقریباََ بیست ئُ ہفت کروڑ ڈالر ادا کروئی ئسک و ایلو ماندہ زرئِ امریکہ ئِ فارن ملٹری فنانسنگ (ایف ایم ایف) سبسڈی نا کمک اٹ فراوان کروئی ئس۔ پنچ شنبے آ ریڈیو پاکستان نا حالات حاضرہ چینل نا پروگرام نکتہ نظراٹی درشان خیال کرسا او پارے کہ پاکستا ن امریکہ غا سفا کرینے کہ او ڈیہہ ٹی طاقت نا توازن ئِ برقرار تخے۔ سرتاج عزیز پارے کہ پاکستان ہشت سولہ جہازآتاہلنگ کن فنڈ انا فراوانی نا معاملہ غا امریکہ تون پدریسہ رابطہ ٹی ئِ ، واہم نن تون پین آپشن ہم ساڑی ارے۔ امریکہ ٹی بھارتی لابی سرگرم ئِ۔ پاکستان دا ساہم امریکہ تون ہڑتوم آ کنڈآتا تعلقداری تا گچینی آ توجوہ تخانے۔ نن دا معاملہ ئِ ایسر کننگ کن تینا کوشست آتے برجاتخنہ۔ اوپارے کہ ایف ایم ایف آن بیدس ایف سولہ جنگی جہاز آتا قیمت اصل اٹ دونیم گناودک۔ سینئر جاچکار ڈاکٹر پرویز اقبال چیمہ پروگرام اٹی بشخ ہلسا پارے کہ امریکہ تون ایف سولہ جہاز آتا ہلنگ کن پاکستان ئِ فنڈ انا فراوانی توننگ نا ہچ ئُ جواز اس افک انتئے کہ دا جنگی جہاز آک دہشت گردی نا برخلاف جاری جنگ اٹ کاریم اٹ اتنگرہ۔ سینئر جاچکار ڈاکٹر آمنہ محمود پارینے کہ پاکستان تون کیہی آپشن آک اریر واہم چین و روس سٹریٹجک خلاغا کننگ اٹی اہم کڑد ادا کننگ کیرہ ۔
