اسلام آباد۔ 31جنوری (اے پی پی) صدر مملکت ممنون حسین پارینے کہ قومی معیشت نا سوگوی کن انفارمیشن ٹیکنالوجی تو توجوہ المی ئِ ، و پوسکن آ نسل ئِ پوسکن ئُ علمی و فکری رجحان آتیان معلومدار کننگ کن انفارمیشن ٹیکنالوجی نا کاریم اٹ اتنگ بھاز المی ئِ۔ اوداہیت ئِ سے شنبے آ داڑے پاکستان نیشنل کونسل آف پاکستان اٹی وزارت انفارمیشن ٹیکنالوجی نا کنڈآن ”پاکستان موبائل ایپ ایوارڈ2016ء“ نا دود آن تران کرسا پارے۔ داوخت آ وزیر مملکت انفارمیشن ٹیکنالوجی انوشہ رحمان ، چیئرمین پاکستان ٹیلی کمیونیکیشن اتھارٹی، ڈاکٹر سید اسماعیل شاہ آن بیدس مہمان تا اسہ بھلو کچ اس ساڑی ئس۔ صدر مملکت پارے کہ حکومت الس ئِ گچین آسراتی فراوان کننگ کن پرعزم ئِ و اونا اولیت آک و حکمت عملی درست سمت اٹی ئُ۔ اوپارے کہ خصوصی بندغ آتے گچین آسراتی فراوان کننگ کن حکومت و وزارت انفارمیشن ٹیکنالوجی غٹ تر وسیلہ غاتے کاریم اٹ اتنگ ئِ۔ صدر مملکت پارے کہ خصوصی بندغ آک ننا راج انا بشخ ئُ و اوفتا خذمت ڈکھیا انسان تا خذمت ئِ۔ اوپارے کہ ہیت کننگ، بِننگ و ہُننگ نا لائخی تون اوار گڑاس پین ویل آتا گواچی خلقت نا آسانی کن ہندن ئُ ایپلی کیشن تیار کننگانے ہرافتیان او فائدہ ہرفنگ کیرہ۔ صدر مملکت پارے کہ دا بھاز خوشی نا ہیت اسے کہ حکومت خصوصی بندغ آتا زند اٹی آسانی ودی کننگ کن ایپلی کیشن تیار کننگ نا مقابلہ اڈ ترفے ہراٹی آئی ٹی نا چاہندار آتا بھلوکچ اس بشخ ہلک۔ اودااومیت نا درشانی ئِ کرے کہ وزارت انفارمیشن ٹیکنالوجی و پی ٹی اے نا زموار آک پین وخت اس ہم ہنداجوزہ تون تینا خذمت نا چرجوئی ئِ برجاہ تخرہ۔ صدر مملکت پارے کہ دنیا نا آبادی نا پانزدہ درسد ہندن انگا بندغ آتیا تالان ئِ ہرا جاگہ نہ جاگہ اس ویل آتا سوب خصوصی بندغ آتا زمرہ ٹی بریرہ۔ دا زمانہ ٹی دُن ئُ ذہین و باصلاحیت خلقت ہم بھلو کچ اسے ٹی ودی مس ہراک تینا جسمانی معذوری ئِ خاطر اٹی اتنگ آن بیدس انسانیت کن عظیم خذمت سرانجام تسر۔ اوپارے کہ پاکستان اٹی بھاز ٹیلنٹ ارے و اوفتے سہی وڑاٹ کاریم اٹ اتنگ نا گرج ئِ۔ صدر مملکت پارے کہ حکومت پاکستان انفارمیشن ٹیکنالوجی نا بشخ انا شونداری کن کیہی اہم گام گیج کرینے و دا چرجوئی ٹی حکومت نا اولیت و حکمت عملی درست ئِ۔ حکومت آپٹیکل فائبر نا تنصیب نا کیہی ڈٹ آتارداٹ تھری جی و براڈ بینڈ سروس آتون اوار دا بشخ اکن فراخ دلی اٹ فنڈ فراوان کرینے ہراڑآن ملک انا پسماندہ و مر مر انگا علاقہ غاتسکان آپٹیکل فائبر نا آسراتی فراوان کننگانے۔ اوپارے کہ انفارمیشن ٹیکنالوجی انسان نا علمی و فنی سفر نا رفتاراٹی پین ودکی کرینے۔ انفارمیشن نا شونداری کن آئی ٹی پارک و ورناتا تربیت کن تعلیمی ادارہ اڈ تسنے و بنائی جماعت آتیٹی ہی انفارمیشن ٹیکنالوجی نا تعلیم ئِ المی گوندنگانے۔ جتا تکنیکی بشخ آتا بابت خصوصی تربیتی پروگرام نا بناءکننگانے۔ جدید علم اسکان رسینگ کن طالب علم آتے کن لیپ ٹاپ نا اجراءکننگانے و ورناتے خصوصی وڑاٹ وظیفہ ہم تننگ انگ ئِ۔ صدر مملکت پارے کہ انفارمیشن ٹیکنالوجی ساڑی دور اٹی انسانی شونداری نا رفتار ئِ ترند تر کرینے و دابشخ اٹی مہارت دوئی کروک آ قومک تینا اقتصادی حالیت ئِ گچین کرینو۔ اوپارے کہ ننا ورناتپہ انفارمیشن ٹیکنالوجی نا بشخ اٹی انقلاب برپا کرسا ملک انا وسیلہ غاتیٹی قابل قدر ودکی کننگ کیرہ۔ صدر مملکت دا اومیت نا درشانی ئِ کرے کہ حکومت انفارمیشن ٹیکنالوجی ئِ آخبت نا گرج آتیان ہم آہنگ کننگ کن پبی گام گیج کیک۔ داوخت آ صدر مملکت 2016ءٹی ایپلی کیشن تیٹی نمان کارکڑد نشان تروک آ چاہندار آتے اعزازہم تس۔
