سی پیک ڈٹ نئے بیرہ پاکستان بلکن بلوچستان نا الس نا شونہالی نا روشنائی ئِ ایسونے، گورنر پنجاب

مردم شماری کرفنگ آن ملکی وسیلہ غاتا گچین بشخ وپانٹ اٹی کمک رسینگک
لاہور۔ 30جنوری (اے پی پی) گورنر پنجاب ملک محمد رفیق رجوانہ پارینے کہ ملک اٹی مردم شماری کرفنگ آن ملکی وسیلہ غاتا گچین بشخ وپانٹ اٹی کمک رسینگک۔ بلوچستان نا الس نا شونداری و اوفتے قومی دنگ اٹی اوار کننگ ساڑی سیاسی سروک نا عزم ئِ، سی پیک ڈٹ نئے بیرہ پاکستان بلکن بلوچستان نا الس نا شونہالی نا روشنائیئِ ایسونے، پاکستان اسہ زیبائُ گلدستہ اسے ہراٹی دانا صوبہ تینا غٹ تر حسن و رعنائی تیانبار پھل انا وڑپیوند ئِ، بلوچستان نا الس حب الوطنی نا جوزہ آن ملک و قوم انا خذمت اٹی پیش پیش ئُ و ای بلوچ ورناتا خن تا چمک اٹی پاکستان نا تابناک آخبت ئِ خنگ اٹی اُٹ۔ داخیال آتا درشانی ئِ او بلوچستان نا ضلع پشین نا کیڈٹ کالج نا طالب علم آتا ڈل اتون ہیت وگپ اٹی کرے۔ ہراک گورنر ہاﺅس لاہور اٹی اوڑتون اوڑدہی کریر ، گورنر پنجاب پارے کہ بلوچستان نا الس نا شونداری و اوفتے قومی دنگ اٹی اوار کننگ ساڑی سیاسی سروک نا عزم ئِ و ہندا سوب ئِ کہ اوفتا ویل آتا ایسری کن غٹ ممکنہ وسیلہ تننگ انگ ئِ۔ اوپارے کہ بلوچستان پاکستان نا آخبت ئِ و سی پیک ڈٹ آن پد دانا اہمیت پین زیات مسنے۔ اوپارے کہ سی پیک ڈٹ نئے بیرہ پاکستان بلکن بلوچستان نا الس نا شونہالی نا روشنائی ئِ ایسونے و دانا پوروی آن داجاگہ نا خلقت ئِ مون آ ہِننگ نا وارخواہی دوبریک۔ گورنر پنجاب بلوچستان نا طالب علم آتیا زورشاغا کہ او تعلیم تون اوار اوار تربیت ئِ ہم تینا شعار جوڑ کیر، خواری و لگن اٹ سرسہبی نا مزل آتے طے کرسا ہر بشخ انا سپہ سالار جوڑ مریر۔ اوپارے کہ نم پاکستان نا معمار ورے۔ نمے بروک آ دے تیٹی پاکستان ئِ لیڈ کروئی ئِ ہنداخاطران نما کاریم نا کچ و لائخی تیٹی ودکی ہی ننا مطمع نظر ئِ۔ اوپارے کہ پنجاب نا تعلیمی ادارہ غاتیٹی بلوچستان نا طالب علم آتے کن کوٹہ ہم ہنداچرجوئی نا اسہ کڑی اسے۔ گورنر پنجاب داوخت آ بلوچ طالب علم آتا سوج آتا ورندی ئِ ہم تس۔ اوپارے کہ ملک اٹی مردم شماری کرفنگ آن ملکی وسیلہ غاتا گچین بشخ و پانٹ اٹی کمک رسینگک و دانا فائدہ یقینا بلوچستان ئِ ہم مریک۔ بلوچ طالب علم آتے وزیراعلیٰ پنجاب اسکیم نا رداٹ لیپ ٹاپ تننگ نا بابت اسہ سوج اسے نا ورندی ٹی گورنر پنجاب پارے کہ او دا چرجوئی ٹی تعلقدار کمامدار آتون ہیت کیک۔ داکان مست پرنسپل پشین کیڈٹ کالج ادارہ نا نصابی و غیر نصابی سرجزآتا بارواٹی گورنر پنجاب ئِ معلومدار کرے۔ داوخت آ طالب علم آتا ڈل گورنر ہاﺅس لاہور نا مطالعاتی دورہ ئِ ہم کرے۔