پاک چین اقتصادی راہداری آن صوبہ ٹی شونداری و شونہالی نا پوسکن آ کسر آک ملنگرہ ، نیشنل پارٹی سی پیک نا خیرمقدم ئِ کیک، مسکوہی وزیراعلیٰ بلوچستان ڈاکٹر عبدالمالک بلوچ نا کوئٹہ ٹی پریس کانفرنس آن تران
کوئٹہ۔ 30جنوری (اے پی پی) نیشنل پارٹی نا سینئر راہشون و مسکوہی وزیراعلیٰ بلوچستان ڈاکٹر عبدالمالک بلوچ پارینے کہ پاک چین اقتصادی راہداری ڈٹ آن صوبہ ٹی شونداری و شونہالی نا پوسکن ئُ کسر ملنگک ، نیشنل پارٹی شونداری نا داعظیم ڈٹ انا خیر مقدم ئِ کیک ولے گوادر و بلوچستان نا الس نا گڑتی تا ازالہ کن المی کانود سازی نا گرج ئِ ، ننا سیاست نا محور الس ئِ پشتون بیلٹ انا سیاسی کارندہ غاتا نیشنل پارٹی ٹی شمولیت ئِ قدرانا نظر اٹ ہرینہ۔ داخیال آتا درشانی ئِ او دوشنبے آ کوئٹہ پریس کلب اٹی رحمت اللہ کاکڑ، یارمحمد مہترزئی ، عبدالرحمان پانیزئی، احسان اللہ سارنگزئی ا یلوفتا نیشنل پارٹی ٹی اوار مننگ نا وخت آ پریس کانفرنس آن تران کرسا کرے۔ داوخت آ نیشنل پارٹی نا بنجائی سیکرٹری اطلاعات جان محمد بلیدی باسک بلوچستان اسمبلی یاسمین لہڑی ، صدیقی پانیزئی ، خیرجان بلوچ، حاجی عطاءمحمد بنگلزئی ئسک ہم ساڑی ئسر۔ ڈاکٹر عبدالمالک بلوچ پارے کہ سیاسی کارندہ غاتا نیشنل پارٹی ٹی شمولیت بھلو پیش رفت اسے ننا دیرینہ خواہش مسنے کہ نیشنل پارٹی ئِ نیشنل السی پارٹی نا متبادل نا وڑاٹ غٹ علاقہ غاتیٹی تالان کین انتئے کہ ننا سیاسی جہد نا محور الس کن اسہ شونہال و شرحالی راج اسے نا جوڑ ئِ۔ اوپارے کہ پشتون سیاسی کارندہ غاتا نیشنل پارٹی ٹی شمولیت آن بلوچستان اٹی رہینگوک آ جتا قوم تا نیام اٹ ہم آہنگی نا فضاودی مننگ تون قومی یکجہتی ئِ مون آ دننگ رسینگک ہراکہ نیشنل پارٹی نا موقف مسنے۔ اسہ سوج اسے نا ورندی ٹی مسکوہی وزیراعلیٰ بلوچستان ڈاکٹر عبدالمالک بلوچ پارے کہ ننا موقف اولیکو دے آن صفا ئِ کہ بے اُرا مروک آ بلوچ آتے پدی تینا علاقہ غاتیٹی آباد کننگے۔
