اسلام آباد۔ 30جنوری (اے پی پی) وزیر داخلہ چوہدری نثارعلی خان پارینے کہ مارچ انا آخر اسکان ہر ضلع ٹی پاسپورٹ آفس اڈ تننگک، ملک انا کیہی بھلا شار تیٹی 14ایگزیکٹو پاسپورٹ دفتر زوت کاریم نا بنائِ کیرہ ۔ دوشنبے آ بلیو ایریا ٹی ایگزیکٹو پاسپورٹ دفتر نا بناءنا وخت آ صحافی تتون ہیت وگپ کرسا وزیر داخلہ چوہدری نثارعلی خان پارے کہ اسہ سال اس مست نادرا و پاسپورٹ نا کمامدارآتے پارت کریسس کہ ملک انا طول و عرض اٹی نادرا و پاسپورٹ نا دفتر اڈ تننگے و دا دفتر آک کسس نا اُرا، دفتر یا غیر سرکاری و سرکاری افسر آتا اُراتیٹی اڈ تننگپس بلکن دا مسخت آتے کن پوسکن آ ماڑی تے دوئی کننگے تانکہ ہراخلقت پاسپورٹ یا شناختی کارڈ جوڑ کرفنگ کن بریر اوفتے گچین ئُ چاگڑد اس دوبرے۔ اوپارے کہ داچرجوئی ٹی کیہی گام گیج کننگا و راولپنڈی ٹی ایگزیکٹو پاسپورٹ دفتر نا اڈتننگ آن پد اسلام آباد اٹی ہم ایگزیکٹو پاسپورٹ دفتر اڈتننگ انگ ئِ۔ اوپارے کہ مسہ تو انا تہٹی ہندا معیار نا 14پین دفتر ملک انا طول و عرض اٹی کاریم نا بنائِ کیرہ۔ کراچی ٹی اِرٹ دونیم تواٹی مسہ سنٹر نا بنائِ کننگک، لاہور اٹی ایگزیکٹو سینٹر تیار ئِ، پشاور ، کوئٹہ و گوجرانوالہ ٹی کاریم برجاہ ئِ و ہموڑے ہم دا دفتر آتے زوت اڈتننگک۔ اوپارے کہ 14میگاسنٹر ہندا سال پورو مریرہ۔
