وزیراعظم نا قومی جان جوڑی پروگرام نا دنگ ئِ فاٹا، گلگت بلتستان و آزاد جموں و کشمیر تون اوار مچ آ ملک اسکان ودفنگ نا پارت
وزیراعظم محمدنواز شریف نا قومی جان جوڑی پروگرام آ عملدرآمد نا پیش رفت نا جاچ ہلنگ کن دیوان اٹی خیال آتا درشان
اسلام آباد۔ 30جنوری (اے پی پی) وزیراعظم محمد نواز شریف پارینے کہ جان جوڑی نا معیاری خذمت اسکان رسینگ ہر پاکستانی نا پیدائشی حق ئِ ، بدقسمتی آن بھلو وخت اسے آن اوفتے داحق آن محروم تخنگا۔ اوداخیال آتا درشانی ئِ دوشنبے آ وزیراعظم ہاﺅس اٹی اسہ دیوان اسے نا کماشی ئِ کرسا کرے ہراٹی او پارت کرے کہ قومی جان جوڑی نا پروگرام نا دنگ ئِ فاٹا، گلگت بلتستان و آزاد جموں و کشمیر تون اوار مچ آ ملک اسکان ودفنگے و چاری گری نا سخت نظام اس اتنگے و عملدرآمد نا کہول آ نا اہلی نا برخلاف سخت بایدے کارروائی کننگے۔ دیوان اٹی وزیراعظم نا قومی جان جوڑی نا پروگرام آ عملدرآمد نا پیش رفت نا جاچ ئِ ہلنگا۔ وزیراعظم پارے کہ جان جوڑی نا معیاری و ہڑزان خذمت آتا فراوانی نا کمک اٹ ہی قوم اقتصادی و راجی وڑتیا تینا پورو لائخی و مسخت آتے دوئی کننگ کیک۔ اوپارے کہ نن جان جوڑی نا خذمت آتا جامع پیکج نا کمک اٹ نیزگار انگا بندغ آتے آسراتی فراوان کننگ خوانہ انتئے کہ داہیت آ باور کیوہ کہ ناجوڑی و نیزگاری نیزگار خاہوت اسے کن بے کچ خطرناک ثابت مننگ کیک ، نن نیزگار و ناجوڑ آتا نیام اٹ خنوک آ دا مہلک تعلق ئِ چٹفنہ۔ وزیراعظم وزارت نیشنل ہیلتھ سروسز ئِ پارت کرے کہ دا پروگرام نا دنگ ئِ فاٹا، گلگت بلتستان و آزاد جموں و کشمیر تو ن اوار مچ آ ملک اسکان ودفنگے و چاری گری نا سخت نظام اس مرتب کننگے و عملدرآمد نا کہول آ نااہلی نا برخلاف بایدے سخت کارروائی کننگے۔ اوپارے کہ بنجائی حکومت مچ آ ملک اٹی دا پروگرام آ عملدرآمد کیک انتئے کہ خیبر پختونخوا و سندھ انا مر مر انگا علاقہ غاک ناجوڑی نا زیات گواچی ئُ و داعلاقہ غاتیٹی نیزگاری نا سوب خلقت درمان دوئی کننگ کپک۔ وزیراعظم پارے کہ حکومت سرکاری وسیلہ غاتا بلاتعطل و پدریسہ فراوانی کن دا پروگرام آ عملدرآمد ئِ المی جوڑ کیک و او خواپک کہ وسیلہ غاتا کمتی نا سوب دا اہم پروگرام آ عملدرآمد اٹی اڑاند اس پیش برے۔ داتاریخی پروگرام اٹی کمکاری کن نادرا و اسٹیٹ لائف انشورنس کارپوریشن آف پاکستان نا کڑد انا ستائِ کرسا وزیراعظم جہانی ادارہ جان جوڑی ، جہانی بینک ، جی آئی زیڈ تون اوار قومی جان جوڑی پروگرام نا تکنیکی شریدار آتیان ہم منت واری نا درشانی ئِ کرے۔ دیوان اٹی وزیر مملکت نیشنل ہیلتھ سروسز سائرہ افضل تارڑ ، مریم نواز شریف، وزیراعظم نا خصوصی کمکارامور خارجہ طارق فاطمی و بڑزکو سرکاری افسرآک ساڑی ئسر۔ وزیراعظم نا قومی جان جوڑی پروگرام اسلام آباد، کوئٹہ، لسبیلہ، لورالائی، مظفرآباد، کوٹلی، سکردو، دیامیر، رحیم یار خان ، خانیوال و ناروال اٹی بناءکننگانے و داوخت اسکان داٹی 8لکھ آن زیات خاہوت رجسٹرڈ مسنوو جتا ناجوڑی تا گواچی 12ہزار آن زیات بندغ آتا درمان کننگانے۔ وزیراعظم نا پارت نا رداٹ پروگرام نا دنگ ئِ داسہ مچ آ ملک اسکان ودفنگک و نیزگار انگا بندغ آتے مفت درمان نا آسراتی فراوان کننگک۔
