صدر مملکت ممنون حسین و وزیراعظم محمد نواز شریف نا اوڑدہی
قومی معیشت نا سوگوی و بدعنوانی ٹی کمتی نا بارواٹی جہانی ادارہ غاتا رپورٹ آ است جمی نا درشان
دہشت گردی و انتہاءپسندی نا چٹفنگ اسکان کارروائیک برجاہ سلرہ و اوفتا بیخ کنی اسکان آرام اٹ تولنگ پننگک
صدر مملکت ممنون حسین و وزیراعظم محمد نواز شریف نا اوڑدہی ٹی عزم
اسلام آباد۔ 30جنوری (اے پی پی) صدر مملکت ممنون حسین و وزیراعظم محمد نواز شریف قومی معیشت نا سوگوی و بدعنوانی ٹی کمتی نا بارواٹی جہانی ادارہ غاتا رپورٹ و الس نا زند انا معیار اٹی گچینی کن حکومت نا کوشست آتیا است جمی نا درشانی ئِ کرسا پاکستان ئِ مون تروک ویل آتا مون ئِ توننگ و شونداری و شونہالی نا شاہراہ غا روان کننگ کن سیوت و یکجہتی آ زورشاغانو۔ دوشنبے آ ایوان صدر نا کنڈآن جاری بیان نا رداٹ وزیراعظم محمد نواز شریف ایوان صدر اٹی صدر مملکت تون اوڑدہی کرے ہراٹی ہڑتوم آ راہشونک قومی و جہانی معاملہ غاتیا ہیت وگپ کریر۔ وزیراعظم نواز شریف صدرمملکت ممنون حسین ئِ درملکی دورہ غاتون اوار قومی معاملہ غاتیا حکومت نا فیصلہ غاتیان معلومدار کرے۔ صدر مملکت پارے کہ قومی معیشت نا سوگوی نا چرجوئی ٹی حکومت نا پالیسیک درست سمت اٹی ئُ۔ اوپارے کہ وزیراعظم و اونا اقتصادی ٹیم تینا سوگو حکمت عملی نا رداٹ قومی معیشت نا گچینی کن قابل قدر کڑد ادا کننگ ئِ ہرانا جہانی کہول آ ہم ستا کننگا۔ اوڑدہی ٹی پاکستان اسٹاک ایکسچینج نا گچین کارکڑد آ ہم است جمی نا درشانی کننگا۔ ہڑتوم آ راہشونک دا عزم انا درشانی ئِ کریر کہ ملک آن دہشت گردی و انتہاءپسندی نا چٹفنگ اسکان کارروائیک برجاہ سلرہ و اوفتا بیخ کنی اسکان آرام اٹ تولپننگک۔ صدر مملکت و وزیراعظم داہیت آ امنا کریر کہ تعلیم و جان جوڑی نا آسراتی تے گچین جوڑ کننگ حکومتی پالیسی برجاہ سلک و حکومت شونداری ایجنڈاآن تینا چکار ئِ اسہ پلو کپک۔ اوپاریر کہ حکومت شونداری عمل اٹی قومی سرمایہ نا درست و شفاف کاریم اٹ اتنگ ئِ ہردروشم اٹ المی جوڑ کیک و بدعنوانی ئِ ہچ ئُ کہول اسے آ سگنگ پننگک۔ اوڑدہی ٹی پاک چین اقتصادی راہداری ڈٹ آ پیش رفت نا جاچ ئِ ہلکر و داڑآ برجاہ پیش رفت آ است جمی نا درشانی ئِ کننگا۔ صدر مملکت و وزیراعظم پاک چین اقتصادی راہداری نا جوڑ جاڑ نا رفتار آ است جمی نا درشانی ئِ کرسا پاریر کہ دا ڈٹ نئے بیرہ پاکستان بلکن مچ آ ڈیہہ کن فائدہ مند جوڑ مریک۔ ہڑتوم آ راہشونک دا عزم انا درشانی ئِ کریر کہ پاک چین اقتصادی راہداری نا عظیم الشان ڈٹ آن غٹ صوبہ و ڈیہہ تے اسہ وڑفائدہ دوئی مریک۔
