ایبٹ آباد۔ 30جنوری (اے پی پی) ڈپٹی اسپیکر قومی اسمبلی مرتضیٰ جاوید عباسی تحصیل حویلیاں کن بجلی و گیس انا فراوانی نا ڈٹ آتے کن اسہ ارب روپئی پیکج نا پڑو ئِ کرینے ۔ این اے 18نا السی ڈل اتون ہیت وگپ اٹی او پارے کہ 850ملین روپئی نا ڈٹ اینخو نا سال جون آن مست پورو کننگرہ وخت اس کہ 2.5بلین نا ایلو ڈٹ آک ہڑدڑی بنداو تیا بناہ کننگرہ۔ اوپارے کہ گچین کاری تیٹی الس تون کروک آ غٹ وعدہ غاتے 2018ءنا گچین کاری تیان مست پورو کننگک۔ اوپارے کہ پاک چین اقتصادی راہداری (سی پیک) نا غٹ آن زیات فائدہ ننا صوبہ ئِ مریک و بروک آ 2سال پاکستان کن امن و سالمیت نا سال مریرہ۔ مرتضیٰ جاوید عباسی پارے کہ وزیراعظم ہیلتھ سکیم نا رداٹ ہزارہ ڈویژن اٹی 2200 کٹ آتیا تالان ہسپتال اس اڈتننگک ولے صوبائی حکومت ہسپتال کن ڈغار تننگ اٹی ہچ ئُ است خواہی اس ہلنگ اف۔ اوپارے کہ ہزارہ موٹروے نا اولیکو فیز تخوک آ وخت جولائی آن مست پورو کننگک ہرانا بناءئِ وزیراعظم پاکستان کیک ، شاہ مقصود و حویلیاں انٹر چینج نا جوڑ جاڑ آن علاقہ ٹی پوسکن آ سفری آسراتی تتون اوار اوار شونداری نا کسرآک ہموار مریرہ۔ اومستی پارے کہ مسلم لیگ (ن) کارکڑد نا بنداو آ 2018ءنا لس گچین کاری تیٹی ہم کلین سویپ کیک و ملکی شونداری نا کسر اٹی اڑاند شاغوک آ عنصرآک تینا ہندا عزم آتیٹی بے سہب مریرہ۔
