اسلام آباد۔ 30جنوری (اے پی پی) مسلم لیگ (ن) نا سینیٹر لیفٹیننٹ جنرل (ر) عبدالقیوم پارینے کہ پاکستان اٹی اقلیت آتے پورو مذہبی آجوئی ئِ و بھارت اٹی مسلمان آتون ناروا سلوک کننگک۔ ریڈیو پاکستان تون ہیت وگپ کرسا اوپارے کہ نن پاکستان و ہندوستان نا تاریخ ئِ است آن دننگ کپنہ۔ بھارت پاکستان نا معرض وجود اٹی بننگ آن ہلیس اینو اسکان اونا مخالفت ئِ کرسا بننگ ئِ و ہندوذہنیت تخوک آک ہمیشہ بھارت اٹی مسلمان تا کچ اٹی ودکی نا مخالفت ئِ کرینو۔ اوپارے کہ بی جے پی آر ایس ایس نا فلسفہ تون حکومت نا نظام ئِ چلیفنگ ئِ وخت اس کہ ارٹ میکو کنڈ پاکستان اٹی اقلیت آتے اسہ وڑ اٹ غٹ حق آک دوئی ئُ و او مذہبی آجوئی اتون زند ئِ تدیفنگ ئُ۔ اسہ سوج اسے نا ورندی ئِ ترسا اوپارے کہ بھارت مقبوضہ کشمیر اٹی تینا ریاستی دہشت گردی ئِ برجاہ تخانے ولے علاقائی ملک آتون اوار بایدے جہانی برادری ئِ مرے کہ او بھارت آ تینا زور ئِ ودفے تانکہ او کشمیری تیا بیدادی ئِ بند کرسا اوفتے اقوام متحدہ نا سلامتی کونسل نا قرارداد آتارداٹ حق خودارادیت ایتے۔
