ملتان۔ 05مئی (اے پی پی) صدر مملکت ممنون حسین پارینے کہ حکومت نا توجوہ جان جوڑی تون اوار غٹ بشخ آتیا تخوک ئِ و اوفتے ٹی اصلاحات اتنگ انگ ئِ۔ اوداہیت ئِ پنچ شنبے آ داڑے بختاور امین میڈیکل کالج و ہسپتال نا افتتاحی دود آن تران کرسا پارے۔ صدر مملکت پارے کہ حکومت جان جوڑی نا آسراتی تے الس اسکان رسیفنگ کن پرعزم ئِ۔ اوپارے کہ جان جوڑی نا ویل آک ہنداخہ گھمبیر ئُ کہ اسہ حکومت اس ہم اوفتے تون تنیا مون تننگ کپک۔ دا چرجوئی ٹی شرحالی ادارہ غاتے حکومت تفوئی مرے۔ اوزورشاغا کہ بھاز انگا ناجوڑی تیان بچفنگ حفظان جان جوڑی نا اصول آتیا عمل کرسا مننگ کیک۔ دا چرجوئی ٹی راجی تنظیم و تعلیمی ادارہ غاتے تینا علاقہ و خاص وڑاٹ مر مر انگا علاقہ غاتے ٹی آگاہی مہم چلیفوئی مرے تانکہ الس اٹی مرض آتا بچفنگ آن بابت شعور ودے و پیچیدہ ویل آتیان نجات ممکن مننگ کے۔ صدر مملکت پارے کہ نن تینا تعلیمی ادارہ غاتے گچین فیکلٹی نا کمک اٹ سینٹرز آف ایکسیلنس نا حیثیت تننگ کینہ۔ دا چرجوئی ٹی ننا جامعہ غاتے بین الاقوامی کہول آ پنی تعلیمی ادارہ غاتون رابطہ غاتے ودفوئی مرے و استاد آتا تربیت کن ہم اوفتے آن کمک دوئی کروئی مرے۔ صدر مملکت پارے کہ اسہ ملک اس ہم ہمو وخت اسکان شون ہلنگ کپک ہراوخت اسکان اونا آبادی نا نیمہ افرادی قوت یعنی نیاڑیک اوار مفس۔ اوپارے کہ دا ہیت خوش آئند ئِ کہ نیاڑیک طبی تعلیم نا دوئی کن پیش پیش ئُ ولے اوفتے مرے کہ او علم دوئی کننگ آن گڈ راج ئِ اونا فائدہ غاتے رسیفیر۔
