کوئٹہ۔ 27جنوری (اے پی پی) وزیراعلیٰ بلوچستان نواب ثناءاللہ خان زہری نا پارت آ بلوچستان نا غٹ ضلع غاتیٹی ساڑی آ پر و برف باری آن پد سروے نا کاریم نا بناءکننگانے و غٹ تعلقدار کمشنر و ڈپٹی کمشنر آتے تینا تینا ضلع غاتیٹی جانی و مالی نسخان تا سرجم رپورٹ راہی کننگ نا پارت کننگانے۔ ساڑی آ پر و برف باری آن بلوچستان نا غٹ ضلع غاک زہمی ئُ ولے قلات، کوئٹہ و ژوب ڈویژن غٹ آن زیات زہمی ئُ۔ ڈپٹی کمشنر نا کنڈآن صوبہ نا غٹ ضلع غاتیٹی تینا ماتحت افسر آتے سروے کن احکامات جاری کننگانے ہرا تینا تینا علاقہ غاتیان سرجم رپورٹ گدریفرہ۔ ڈپٹی کمشنر آتا توسط اٹ سرجم رپورٹ صوبائی حکومت و پی ڈی ایم اے ئِ گدریفنگک ہرانا رداٹ پی ڈی ایم اے نسخان تا اندازہ ئِ خلنگ کن امدادی گڑا ہرافتے ٹی خور ، کمبل، تمبو، رزان و نغدی اوار ئِ ۔ وزیراعلیٰ بلوچستان نواب ثناءاللہ خان زہری و صوبائی وزیر سرفراز بگٹی امدادی گڑاتیٹی شفافیت نا بابت سختی اٹ پارت جاری کرینے تانکہ حقدار زہمی تے امداد نا فراوانی ئِ المی جوڑ کننگے۔ اوداہیت انا ہم سختی اٹ پارت کرے کہ امدادی گڑاتا بازاراٹی بہاءکننگ نا ہچ گہس ئِ موکل تفننگک۔ میڈیا آن دابابت پبی کمک نا خواست کننگانے تانکہ ماضی آنبار امدادی گڑاک مارکیٹ آتیٹی بہا مننگ کپس۔
