وزارت ڈٹ بندی و شونداری نا کنڈآن قومی اسمبلی ٹی ورندی
اسلام آباد۔ 26جنوری (اے پی پی) وزارت ڈٹ بندی و شونداری نا کنڈآن قومی اسمبلی ئِ پاننگانے کہ گوادر بندرگاہ نا 500,000ٹن اسکان خام تیل انا بھلو کنٹینر گدرینگ انگ نا کچ ارے۔ دا ملک اٹی اقتصادی شونداری ئِ مون آ دیک و ہندی بندغ آتے بھلو روزگار نا وارخواہی اس فراوان کیک۔ دا دنیا ئِ 40درسد اسکان تیل فراوان کروک آ خلیج نا دھانہ غا واقع ئِ ، اقتصادی وڑاٹ وسط ایشیائی ریاست آتا ہنوک آ دا خڑک انگا کسر ئِ، چاہ بہار بندرگاہ ایران اٹی بھارت 131ملین ڈالر نا زرکاری کرینے۔ پنچ شنبے آ قومی اسمبلی ٹی وقفہ سوج آتیٹی ڈاکٹر شازیہ ثوبیہ نا سوج انا ورندی ٹی ڈاکٹر عباداللہ پارے کہ گوادر بندرگاہ خلیج اومان آ واقع ئِ ، ہرا خلیج فارس نا دھانہ نا خڑک ئِ۔ دا اسہ بھلا باسن دیر انا سمندری بندرگاہ ئِ ہرا کم وود 460کلو میٹر کراچی نا دیکی ٹی و کم و ود 75کلو میٹر ایران نا سیم اتون پاکستان نا دے ٹک اٹی ئِ۔ دا تیل آن مالامال دے ٹکی نیامی نا نیام اٹ و خشکی ٹی تموک اوغانستان و گنجان آباد سویلی ایشیانا کمک اٹ تیل آن مالامال وسط ایشیائی ریاست آتا ہنوک آ اقتصادی وڑاٹ خڑک انگا کسر ئِ۔ دا خلیج نا دنگ آواقع ئِ ہرانا کمک اٹ دنیا نا 40درسد تیل ہردے گدرینگک ۔ گوادر بندرگاہ نا 500,000 ٹن اسکان خام تیل نا بھلو کنٹینر گدرینگ انگ نا کچ ارے۔ اوپارے کہ دا ملک اٹی اقتصادی شونداری ئِ مون آ دیک و ہندی بندغ آتے بھلو روزگار انا وارخواہی اس فراوان کیک۔ آجو واپار و اقتصادی زون و ایکسپورٹ پراسیسنگ زون انا اڈتننگ درملکی زرکاری و ہندی بندغ آتے روزگار نا وارخواہی فراوان کیک۔ گوادر صوبہ بلوچستان کن کٹیا دوئی کننگ نا بھلا ذریعہ مریک۔ ایلو ماندہ پاکستان اوغانستانی و نیامی ایشیاآن سڑک و ریل گاڈی تون گنڈوک مننگ آن پد دا واپاری بنجاہ جوڑ مریک۔ اوپارے کہ نیامی ایشیائی ریاست و سینکیانگ و سیچو آن صوبہ غاتون درملکی واپار کننگ کن پاکستان نا آخبت اٹی گوادر ئِ شونداری تننگ نا ڈٹ ئِ۔ اوپارے کہ چاہ بہار بندرگاہ ایران و سیستان و بلوچستان نا مکران نا کرکی علاقہ ٹی واقع ئِ و ایرانی حکومت نا کنڈآن سرکاری وڑاٹ اودے آجو واپار و صنعتی زون گوندنگانے۔ ہندوستان دا بندرگاہ آ 131ملین ڈالر اسکان زرکاری کرینے۔ دا بے کچ رکھوک، وسط ایشیاو اوغانستان نا منڈی تسکان خڑک انگا کسر ئِ ۔ چاہ بہار نا بندرگاہ ٹی برتھ اٹی لس گڑا و بھلو کچ اسے ٹی گڑااتنگ اوار ئِ ۔ برتھ انا کچ 2000آن ہلیس 2500 ٹن اسکان ئِ۔ چاہ بہار شہید بہشتی گھاٹ انا مرغنی 600میٹر ئِ و داٹی 25000ٹن اسکان بحری جہاز و 11میٹر ڈراٹ اسہ وخت سلنگ کیرہ۔
