بشکک۔ 22مئی (اے پی پی) وزیر خارجہ شاہ محمود قریشی پارینے کہ چین ننا عزیز انگا سنگت و بے کچ سوگو شریدار ءِ، پاک چین سنگتی ننا خارجہ پالیسی نا اہم ءُ تمبہ اسے، ننے قومی سلامتی نا معاملہ غاک مون تروک مریر یا علاقائی امن و سوگوی نا ہیت مرے چین نا کڑد مدام ستاکڑزوک مسنے۔ داخیال آتا درشانی ءِ او چارشنبے نادے آ شنگھائی کمکار تنظیم نا وزرائے خارجہ کونسل نا دیوان نا وخت آ تینا چینی ہم منصب مسٹروانگ ژی تون خصوصی اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری، ڈیہہ ٹی امن و ایمنی نا حالیت آتون اوار ایلو تین پہ تینی است خواہی نا معاملہ غاتیا گپ و تران کننگا۔ اوڑدہی ٹی وزیر خارجہ شاہ محمود قریشی پارے کہ چین ننا عزیز انگا سنگت و بے کچ سوگو شریدار ءِ۔ پاک چین سنگتی ننا خارجہ پالیسی نا اہم ءُ تمبہ اسے۔ اوپارے کہ ننے قومی سلامتی نا معاملہ غاک مون تروک مریر یا علاقائی امن و سوگوی نا ہیت مرے چین نا کڑد مدام ستاکڑزوک مسنے۔ مخدوم شاہ محمود قریشی تینا چینی ہم منصب ءِ ارٹ میکو بیلٹ اینڈ روڈ فورم نا سرسہب اڈتننگ آ مبارکباد پیش کرے۔ اوڑدہی ٹی چینی وزیر خارجہ پارے کہ دا فورم نا سرسہبی جہانی برادری نا چین نا پالیسی تیا پت انا درشان ءِ۔ وزیر خارجہ مخدوم شاہ محمود قریشی تینا چینی ہم منصب ءِ چائنہ نا ہفدہ می یوم جمہوریہ نا مبارکباد پیش کرے۔
