اسلام آباد۔ 20 مئی (اے پی پی) وزیراعظم نا سلاہکار واپار عبدالرزاق داؤد تون بلغاریہ نا ڈپٹی منسٹر آف اکانومی للیہ ایوانوا اوڑدہی کرے۔ دوشنبے نادے آ مروک آ اوڑدہی ٹی ہڑتوم آ کنڈآتا واپار و زرکاری ءِ مون آ دننگ آ گپ و تران کننگا۔ داوخت آ سیکرٹری زرکاری بورڈ عمر رسول و وزارت واپار نا بڑزکو کمامدارآک ہم ساڑی ئسر۔ پاکستانی سٹرس فروٹ، امب، برنج و کاٹن تون اوار سرجیکل ازباب و ہینڈی کرافٹ تون اوار ایلو ملکی مصنوعات آتا برآمد آتا بلغاریہ نا منڈی تسکان رسینگ ءِ ودفنگ آ امنا کننگا۔ سلاہکار واپار عبدالرزاق داؤد پارے کہ پاکستان نا انجینئرنگ و آٹو موبائل نا بشخ آتے ٹی زرکاری نا گچین وارخواہی اسے، ساڑی حکومت کاروبار اٹی آسانی ودی کننگ ءِ۔ اوپارے کہ بلغاریہ نا زرکارآک پاکستان اٹی زرکاری آن پبی فائدہ ہرفر۔ اوڑدہی ٹی تین پہ تینی واپار تون اوار ہڑتوم آ ملک آتا نیام اٹ کشاری بشخ اٹی کمکاری ءِ ودفنگ آ ہم گپ و تران کننگا۔ بلغاریہ نا ڈپٹی منسٹر آف اکانومی للیہ ایوانوا دا وخت آ پارے کہ ہڑتوم آ ملک آتا نیام اٹ معاشی کمکاری ءِ پین مون آ دننگک۔ سیل و سوات، انفارمیشن ٹیکنالوجی و تعلیم نا بشخ آتے ٹی ہڑتوم آ کنڈآتا کمکاری ءِ ودفنگ نا بھلو وارخواہی اس ساڑی ارے، دا بابت ہڑتوم آ کنڈآتا کمکاری ءِ مون آ دننگک۔ اوپاکستانی زرکارآتے بلغاریہ ٹی زرکاری نا سلہ ہم خلک۔
