بنجائی وزیر داخلہ نا وزیراعلیٰ پنجاب تون اوڑدہی

صوبہ ٹی کوزہ گر آتا برخلاف بے پرخ آپریشن برجاسلک، عثمان بزدار
اسلام آباد۔ 20 مئی (اے پی پی) بنجائی وزیر داخلہ بریگیڈیئر (ر) اعجاز شاہ دوشنبے نادے آ وزیراعلیٰ پنجاب سردار عثمان بزدار تون اوڑدہی کرے۔ اوڑدہی ٹی صوبہ ٹی امن و ایمنی و سیکورٹی نا حالیت آتے پین گچین کننگ نا بابت گام گیج آتیا گپ و تران کننگا و امن و ایمنی و سیکورٹی نا حالیت آتا پین گچینی کن ہروڑاٹ گام گیج ہرفنگ آ امنا کننگا۔ اوڑدہی ٹی فیصلہ کننگاکہ مذہبی منافرت آ مبنی لٹریچر نا شینک و بشخ وپانٹ کروک آتا برخلاف کریک ڈاؤن کننگک و اشتعال انگیز تقریر کروک آتا برخلاف بے پرخ کارروائی مریک۔ امن عامہ نا گچینی کن پنجاب و بنجا نا نیام اٹ مربوط کوآرڈینیشن آ امنا کننگا، صوبہ ٹی کانود نا عملداری ءِ ہربہا آ المی کننگک۔ اوڑدہی ٹی تین پہ تین امنا کننگاکہ الس نا جان و مال انا رکھ آن زیات ہچ ءُ اولیت اس اف۔ اوڑدہی ٹی وزیراعلیٰ باوری کرفے کہ پنجاب اٹی امن و ایمنی نا حالیت آتے پین گچین کننگ کن ہر المی گام گیج کننگک۔ صوبہ ٹی کوزہ گر آتا برخلاف بے پرخ آپریشن برجاسلک۔ داوخت آ بنجائی وزیر داخلہ بریگیڈیئر (ر) اعجاز شاہ پارے کہ بنجائی وزارت داخلہ امن و ایمنی نا حالیت آتا بابت پنجاب حکومت ءِ سپورٹ کیک۔ ای پنجاب آن پد ایلو صوبہ غاتا ہم دورہ ءِ کیوہ۔ داوخت آ صوبائی وزیر کانود محمد بشارت راجہ، چیف سیکرٹری، انسپکٹر جنرل پولیس، ایڈیشنل چیف سیکرٹری داخلہ و پرنسپل سیکرٹری وزیراعلیٰ ئسک ہم ساڑی ئسر۔