وزیراعظم نا خصوصی کمکار سمندر پارپاکستانیز سید ذوالفقار علی شاہ بخاری نا ”اے پی پی“ تون گپ و تران

اسلام آباد۔ 19 مئی (اے پی پی) سمندر پار پاکستانی تا کنڈآن جائیداد آتیا کوزہ نا غا و تا رداٹ بنجائی حکومت نا پولیس اسٹیشن آتے ٹی خصوصی سیل اس جوڑ کننگ انگ ءِ۔ وزیراعظم ناخصوصی کمکار سمندر پارپاکستانیز سید ذوالفقار علی شاہ بخاری یک شنبے نادے آ داڑے ”اے پی پی“ تون گپ و تران کرسا پارے کہ سیل جولائی نا ایسر آن آپریشنل مریک۔ اوپارے کہ دا وزارت سمندر پار پاکستانی و اسلام آباد پولیس نا اسیجا ءُ گام گیج اسے و دانا مسخت سمندر پار پاکستانی تا جائیداد آ کوزہ نا بابت ویل آتے ایسر کننگ نا ءِ، اسلام آباد اٹی دا آئیڈیا نا سرسہبی آن پد مچ آ ملک اٹی داوڑنا سیل جوڑ کننگک۔ سید زلفی بخاری پارے کہ اسلوب حکمرانی تحریک انصاف نا منشور نا بنداوی ٹک آتے ٹی اوار ءِ، عمران خان نا کماشی ٹی السی ویل آتا ایسری کن غٹ المی گام گیج کننگک۔ اوسمندر پار رہینگوک پاکستانی تا جائیداد نا بابت ویل آتا ایسری کن عدلیہ، ریونیو ڈیپارٹمنٹ و پولیس نا نیام اٹ سوگو اشتراک کار و رابطہ غاتا گرج آ زور شاغا۔ اسہ سوج اسے آ اوپارے کہ سمندر پار رہینگوک پاکستانی تا کنڈآن وزارت ءِ زیات تر غاو جائیداد آ کوزہ و پُلنگ نا واقعہ غاتا بابت ءُ ہنداخاطران دا ویل آتے ایسر کننگ کن جامع حکمت عملی اس جوڑ کننگ انگ ءِ۔ دا چرجوئی ٹی فاسٹ ٹریک کورٹس انا ٹہیفنگ کن وزارت کانود و انصاف ءِ سلاہ راہی کرینن۔ اوپارے کہ وزیراعظم نا پارت آ سمندر پار پاکستانی تا ویل آتے اولیتی بنداو تیا ایسر کننگ انگ ءِ انتئے کہ سمندر پار پاکستانی ملک انا گچین خذمت ءِ کننگ ءُ۔