زرکاری بورڈ انا چیئرمین ہارون اشرف نا اے پی پی تون گپ و تران

پاک چین اقتصادی راہداری نا رداٹ 4 خصوصی اقتصادی زون تا پوروی آ پبی و خصوصی چکار کننگ انگ ءِ
اسلام آباد۔ 19 مئی (اے پی پی) زرکاری بورڈ انا چیئرمین ہارون اشرف پارینے کہ پاک چین اقتصادی راہداری نا رداٹ 4 خصوصی اقتصادی زون تا پوروی آ پبی و خصوصی چکار کننگ انگ ءِ، اوغانستان نا خڑک لوکیشن نا سوب آن رشکئی اقتصادی زون نا تزویراتی اہمیت زیات ءِ۔ داہیت ءِ او اے پی پی تون خصوصی گپ و تران کرس پارے۔ اوپارے کہ پاک چین اقتصادی راہداری نا رداٹ ہر چار آ صوبہ(رشکئی، دھابیجی، علامہ اقبال انڈسٹریل سٹی فیصل آباد و بوستان(بلوچستان) اٹی دا اقتصادی زون تے جوڑ کننگ انگ ءِ۔ رشکئی اقتصادی زون آ مروک آ پیش رفت نا ذکر ءِ کرسا اوپارے کہ ساڑی ہی ٹی چین نا روڈ اینڈ بریج کارپوریشن نا ڈل زرکاری بورڈ انا دورہ ءِ کرینے، دا دورہ ٹی رشکئی اقتصادی زون ءِ آپریشنل کننگ نا بابت نظام الاوقات و ایلو معاملہ غاتیا سجفیر۔ اوپارے کہ اوغانستان نا خڑک لوکیشن نا سوب آن رشکئی اقتصادی زون نا تزویراتی اہمیت زیاتءِ، چین رشکئی اقتصادی زون ءِ ایلو اقتصادی زون تیکن رول ماڈل اس گوندانے، دا خیبر پختونخوانا حکومت و چین نا روڈ اینڈ بریج کارپوریشن نا اسیجا ڈٹ ءِ ہرانا مسخت کاروبار اٹی آسانی تننگ نا ءِ۔ چیئرمین زرکاری بورڈ پارے کہ چین نا روڈ اینڈ بریج کارپوریشن نا ڈل انا دورہ ٹی رشکئی اقتصادی زون کن ترغیباتی پیکج آتیا گپ و تران مسنے۔ اسہ سوج اسے آ او پارے کہ غٹ سلاہ ئی 7 اقتصادی زون اِراسال انا وخت اٹ ایسر مریرہ۔ دا اقتصادی زون تیٹی واپارو کاروبار اٹی آسانی فراوان کننگک۔ اوپارے کہ زرکاری بورڈ ءِ غٹ خصوصی اقتصادی زون تیکن5 ہزار ایکڑ صنعتی ڈغار درکار ءِ۔ خصوصی اقتصادی زون تیان ملک انا غٹ بشخ آتے ٹی اسہ وڑ بنداوتیا کاروبار و زرکاری ٹی آسانی فراوان مریک۔ اسہ سوج اسے آ اوپارے کہ حطار خصوصی اقتصادی زون ہم بورڈ انا اولیت آتے ٹی اوارءِ، بجلی نا سوب آن خصوصی اقتصادی زون تیا کاریم نا رفتار اٹی سست روی بسوسس ولے 27 مارچ آن بجلی نا ویل ءِ ایسر کننگانے۔ اسلام آباد اٹی خصوصی اقتصادی زون نابابت سوج آ او پارے کہ انجینئرنگ و انفارمیشن ٹیکنالوجی زون تا جوڑ کننگ برجاءِ، بروک آ اِرا ہفتہ ٹی دا بابت غٹ تر سرجم آتے گڈیکو دروشم اس تننگک۔