وزیر خارجہ شاہ محمود قریشی نا کویتی پوریاگر آتا ڈل اتون گپ و تران

پاکستان، کویت تون تعلقداری تے بے کچ اہمیت ایتک، ہڑتوم آ ملک آتا نیام اٹ اقتصادی کمکاری ءِ مون آ دننگ آن تین پہ تینی تعلقداری تے سوگو کننگ نا ءِ
اسلام آباد۔ 19 مئی (اے پی پی) وزیر خارجہ شاہ محمود قریشی پارینے کہ پاکستان، کویت تون تعلقداری تے بھاز بے کچ اہمیت ایتک۔ ہڑتوم آ ملک آتا نیام اٹ اقتصادی کمکاری ءِ مون آ دننگ آن تین پہ تینی تعلقداری تے سوگو کننگ نا ءِ۔ کویت نا دورہ نا وخت آ کویتی پوریاگر آتا ڈل اتون گپ و تران کرسا وزیر خارجہ پارے کہ پاکستان زرکار آتے ہروڑنا آسراتی تننگ ءِ۔ کوتی کمپنیک پاکستان اٹی پین زرکاری کیر۔ شاہ محمود قریشی پارے کہ کویت نا بھاز انگا کمپنیک پاکستان اٹی سرسہبی اٹ کاروبار کرسا بننگ ءُ۔ تحریک انصاف نا حکومت بزنس انفراسٹرکچر ڈویلپمنٹ نا ایجنڈا غا کاریم کننگ ءِ، ننااست خواہی ءِ کہ کویتی کمپنیک پاکستان اٹی زیات آن زیات زرکاری کیر۔ شاہ محمود قریشی کویتی بزنس کمیونٹی نا ڈل ءِ باوری کرفے کہ پاکستان پیشن نا زرکارآتے ہروڑنا آسراتی تننگ ءِ۔ پاکستان اٹی اقتصادی سفارتکاری نا بناءِ کرینن دا چرجوئی ٹی غٹ سفارت خانہ غاتے خصوصی پارت تننگانے کہ او زرکارآتے پاکستان اٹی ساڑی کاروباری وارخواہی تیان معلومدار کیر و اوفتے زرکاری کن اتیر۔ وزیر خارجہ پارے کہ معیشت نا ری سٹرکچرنگ کن جوڑ کروک آ بڑزکو کہول کمیٹی نا سرکڑدہ ہی و چاروکی ءِ وزیراعظم عمران خان تینٹ کننگ ءِ۔