نیویارک۔ 18 مئی (اے پی پی) پاکستان سرمایہ نا غیر کانودی بہاؤ ءِ توننگ کن ملکی و جہانی کہول آ پین سخت کوشست آتا گرج آ زور شاغانے۔ داہیت ءِ اقوام متحدہ ٹی پاکستان نا آخبتی مندوب ڈاکٹر ملیحہ لودھی تدوک آ دے سرمایہ نا غیر کانودی بہاؤ ءِ توننگ نا رداٹ بڑزکو کہول نا دیوان اسے آن تران کرسا پارے۔ اوپارے کہ پاکستان نا حکومت دا غیر کانودی گام گیج نا برخلاف اقوام متحدہ نا انسداد وڈی خوری نا کانود تون اوار غٹ جہانی کانود ومعاہدہ غاتے مون آ تخسا گام گیج ہرفنگ کن پرعزم ءِ، سرمایہ نا اسہ ملک آن ایلو ملک آ غیر کانودی گدریفنگ اٹ خاص کر شون ہلوک ملک آتے ٹی اقتصادی شونداری آ منفی زہم تمک۔ اوپارے کہ سرمایہ نا غیر کانودی گدریفنگ معاشی کارکڑدگی ءِ زہمی کننگ تون اوار اوار نیزگاری نا چٹفنگ نا کسر اٹ ہم اڑاند ودی کیک۔ ڈاکٹر ملیحہ لودھی پارے کہ سرمایہ نا غیر کانودی بہاؤ و منی لانڈرنگ نا چٹفنگ کن جہانی برادری نا سخت کوشست آک المی ءُ و دا رداٹ پاکستان تینا کڑد ءِ ادا کننگ ءِ۔
